Su Comunu de Altzaghena est chirchende artistas pro torrare a fàghere s’installatzione subra de s’iscalinada de Santa Lughia, ispirende·si a su tema de sa paghe. Su tìtulu de su bandu pro seberare sas propostas est apuntu, “Una scalinata pro sa paghe” e est giradu a artistas, professionistas, agèntzias, aziendas pro realizare un’òpera de inchingiare pro Pasca manna.
“S’installatzione est divennida un’apuntamentu artìsticu-culturale annuale – ispiegat sa delegada a sa Cultura, Valentina Geromino – donamus sa possibilidade a artistas de importu natzionale e internatzionale de interpretare e rapresentare su tema de sa paghe cun cuntzetos astratos, o particulares riferimentos a s’atualidade. S’amministratzione de su Comun bolet promòvere unu messàgiu de paghe nou a traessu de un’òpera chi at a donare balore a su tzentru istòricu”.
S’installatzione at a pòdere èssere realizada subra de 70 tàulas in linna chi su Comunu at postu a disponimentu o cun s’impreu de unas àteras tècnicas.
