Sa presidente de sa Regione Sardigna, Alessandra Todde, intrat tra sos primos deghe polìticos prus “sotzial” in Itàlia. Sa classìfica est istada elaborada pro Primaonline dae Sensemakers e cunfirma sas primas duas positziones cun Matteo Salvini a cabu, sighidu dae Giorgia Meloni.
Siat Salvini chi Meloni calant pro sas interatziones, -23% pro su leader de sa Lega e -56% pro sa premier.
Sa classìfica, fintzas in sas positziones chi sighint, finas a sa de sete, torrat a cunfirmare sos matessi nùmenes: iseti Luca Zaia e Silvia Sardone s’iscambiant de positzione. Su guvernadore de sa Campània, Vincenzo De Luca, a pustis de àere fatu sa torrada sua in classìfica a su cumintzu de s’annu nou, iscala su ranking ponende·si a su de oto postos.
Alessandra Todde, a pustis de su votu sardu de su 25 freàrgiu, arribbat pro sa prima bia in sa graduatòria de su mese: a paridade de post publicados cun su mese passadu, in freàrgiu otenet una crèschida de su +150% in sas interatziones. A tragiare sos nùmeros est Facebook, prataforma chi, paris cun Instagram, Todde impreat de prus pro sa comunicatzione sotzial sua, mancari su primu post cun prus interatziones siat in TikTok: unu video ringratziamentu pro sa vitòria sua. In fines sa classìfica de sos “top 10 best performing post” bidet comente a atores printzipales Salvini, Meloni, Alessandro Di Battista e Giuseppe Conte.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
