Chie fiat Ignazio Delogu

Unu poeta, pensadore, giornalista sardu. Ma pagu connotu. Est istadu presentadu a sa Fabbrica del Cinema de Crabónia unu primu filmadu chi antìtzipat sa presentatzione de unu docufilm cun su tìtulu “Ignazio, storia di lotta, d’amore e di lavoro”, firmadu dae su regista Marco Antonio Pani, subra de sa figura de Ignazio Delogu iscumpartu deghe annos a oe.

Delogu in sa vida sua est istadu professore de limba ispagnola in sas Universidades de Tàtari e de Bari, est istadu giornalista de s’Unità e de sa Nuova Sardegna, at iscritos libros, at àpidu unu rolu de importu acanta de Enrico Berlinguer cando su Pci faeddaiat cun sos partidos comunistas de Ispagna e de s’Amèrica latina. Delogu est istadu presidente de su comitadu Italia-Cile cando s’Itàlia at agiudau medas persones chi fuiant dae su Cile pro more de su Golpe de Pinochet in su 1973 e prima, pro s’atividade sua in su Pci, teniat unu ligàmene diretu cun su presidente democràticu Salvador Allende.

Ma est istadu pruschetotu un’iscritore e poeta capatzu de faeddare a su matessi tempus cun persones de calesi-siat logu e tìtulu de istùdiu. E difatis frecuentaiat iscritores comente Gabriel Garcia Marquez, poetas comente Rafael Alberti e Pablo Neruda, de sos cales bortaiat in italianu sas òperas, ma teniat semper in su coro sos massajos e sos personàgios de sa bidda sua: Ùsini. Mancari sa vida sua siat istada unu biàgiu tra tzitades mannas comente Madrid, Santiago de Cile, Roma, Firenze, Bari, Delogu non at mai truncadu su ligàmene cun sa Sardigna, cun sa limba sarda e cun sos logos de s’ìsula nostra. At iscritu medas poesias in sardu, cun su libru ‘Oscura Notizia’ at bìnchidu su Premiu Dessi in su 1992, at descritu sa Sardigna in vàrios libros comente, pro narrere, ‘La Luna di via Ramai’ dedicadu a Tàtari e ‘Carbonia Utopia e progetto’.

S’idea de ammentare Delogu in una pellìcula naschet gràtzias a su sòtziu Amici della Miniera e su film est istadu produidu dae sa Società Umanitaria-Cineteca Sarda. “Su còmpitu de cuntènnere a intro de unu film sa vida, s’òpera e su pensamentu de un’intelletuale aici mannu e, a dolu mannu disconnotu, non est istadu simpre”, afirmat Marco Antonio Pani. “Su traballu de chirca at cumportadu sa realizatzione de 34 intervistas, cun testimonias de importu comente a s’iscritora Maria Giacobbe, su fundadore de sos Inti Illimani Horacio Duràn, su poeta tzilenu Antonio Arévalo, su sutasegretàriu a sa giustìtzia de su Guvernu Allende, José Antonio Viera Gallo, e medas àteros. Ma est mescamente Ignazio Delogu a contare de isse a traessu de sas paràulas suas chi at lassadu in sos artìculos chi iscriat, in sas prefatziones a sos volùmenes chi curaiat, in sos sàgios e in sas registratziones chi at lassadu”.


Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*