S’eletzione a presidente de su Parlamentu Europeu de Roberta Metsola, deputada maltesa, est una noa de importu chi movet chistiones meda non solu subra de sa rapresentatividade de totu sos pòpulos in Europa, ma prus che totu subra de sa cunditzione de sa Sardigna de su benidore, semper prus isulada, privada de rapresentatividade dae s’istadu italianu.
Malta est un’isuledda ispèrdia in su Mediterràneu. Mesu milione de abitantes campant de turismu, finàntzia e start up tecnològicas. Est s’istadu prus piticu de s’Unione. Est indipendente dae su 1974 e dae su 2004 est in s’Eurozona. Tenet finas una limba sua, su maltesu, chi est limba ufitziale in Malta e una de sas limbas ufitziales de s’Europa. Faghet pensare a su chi nos narant onni die.
Nos narant ca sa Sardigna est un’isuledda ispèrdia in su Mediterràneu chi mai at a pòdere bìvere de sas resursas suas, chi sa limba sua, faeddada dae prus de unu milione de personas (su dòpiu de sos maltesos) non serbit a livellu internatzionale. Nos narant ca pro esìstere tenimus bisòngiu de èssere agiudados, chi s’insularidade in Costitutzione est una manera pro nos permìtere de nos cullegare mègius cun chie nos cumandat.
Ma su chi non nos narant, su chi non cherimus cumprèndere, est ca sa sorte est in manos nostras, chi s’eletzione de custa pitzinna de 43 annos, avocada, esperta de polìtica europea, natzionalista, giai segretària de sos giovanos de su Ppe, nàschia e crèschia in una isuledda de su Mediterràneu, est su sìnnale prus làdinu de su fallimentu de sa polìtica sarda, de sa derruta de su cuntzetu de autonomia, de sa mediocridade de sa classe dirigente nostra, cane a fune curtza de sa politica romana, umbrosa che unu pitzinneddu chi s’amparat cun sa manu pro no èssere iscutu.
Tando sa domanda est: ma si unu maltesu chi intrat in su parlamentu europeu podet pretèndere de chistionare sa limba sua e nois depimus preguntare de pòdere chistionare in sardu finas in sos cunsìgios comunales; si Malta tenet chimbe rapresentantes in Europa e nois semus custrintos dae una lege ridìcula a mandare sos sitzilianos a faeddare de nois, a ue cherimus andare?
Metsola, isperemus chi siat pro nois unu faru, unu esempru, siat pro fìgios nostros su chi nde tirat su velu de maya e iscrarit sa cussèntzia e sas oportunidades pro unu pòpulu chi ancora depet iscrìere s’istòria sua.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
Foto dae: Twitter
