Fintzas in Sardigna sos tzitadinos interessados a sa libertade de Julian Assange si sunt organizende. Su primu de freàrgiu est di fatis nàschidu su grupu Free Assange Sardinia chi, pro sa càusa de s’editore de WikiLeaks, est organizende unos cantos apuntamentos in ocasione de su Day X.
Su 20 de freàrgiu sos giùighes britànnicos s’ant a dèvere espressare in contu de estraditzione de su presoneri a sos Istados unidos. Su matessi die, in Casteddu b’est sa manifestatzione, dae sas ses de sero. S’addòbiu est in pratza de su Càrmene cun su corteu peri sas carreras de su cabu de logu. Ma in antis de tando b’at àpidu duos apuntamentos preliminares in Tàtari, su 14 (a banda de mangianu in carrera de Turati) e su 15 (a parte de sero in pratza Castello) cun duos sit-in.
Sa punna est sa de fàghere a manera chi sos guvernos lompant a una solutzione diplomàtica pro sa liberatzione de Assange e pro sa libertade in s’informatzione. Pro su grupu sardu, gasi comente pro cada ativista peri su mundu, s’estraditzione a Amèrica at a ingendrare unu pretzedente internatzionale ponende in perìgulu cada giornalista chi s’atrivat a dare a ischire novas imbarratzantes pro una grande potèntzia.
Sos de Free Assange Sardinia ant imbiadu una lìtera ufitziale a su Guvernu italianu pro chi pedat a sos Istados unidos de archiviare sas acusas de ispionàgiu e ordimìngiu informàticu istèrridas dae sas amministratziones Trump e Biden. Àteras lìteras ant a èssere imbiadas a sos parlamentares de cada grupu polìticu pedende s’impignu issoro.
Julian Assange, su 2010, pongeit a disponimentu de su pùblicu mundiale unas chèntinas de mìgias de documentos segretos in ue si podiant iscumproare crìmines de gherra e violatziones de deretos umanos in sas invasiones de s’Iraq e de s’Afghanistas. Dae chimbe annos nch’est in sa presone de Belmarsh, in Londra, isetende su disinnu chi totu cantos semus timende.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
