Cale est s’entidade de sos costos in tèrmines de mancadu isvilupu e sos disacatos chi benint de sa presèntzia de sas bases militares in Sardigna e in Còrsica? Custa est sa pregonta chi si sunt fatos sos rapresentantes de iRs, ProgRes e Torra e de su movimentu ‘Corsica Libera’ chi cherent chi “sas istitutziones sardas e corsas cummissionent un’istùdiu indipendente subra sos costos e sos profetos de sas tzerachias militares”.
Sos dirigentes de sos rispetivos partidos polìticos, chi si sunt addobiados sa colada chida a Tàtari, ant presentadu unu documentu unitàriu a sos òrganos de informatzione in ue ispiegant ca est arribbadu su momentu de fàghere sos contos cun sa chistione de sa presèntzia militare italiana in terra sarda dae unu puntu de bista pragmàticu meda, chi cunsentat de formulare una proposta cumpartzìbile dae sa majoria de sas tzitadinas e de sos tzitadinos.
“Su pòpulu sardu e su pòpulu corsu tenent su deretu de connòschere a beru cale est sa situatzione econòmica de sas bases militares in tèrmines de costos, de cuantificatzione de mancadu isvilupu, de disacatos a s’ambiente e a sa salude, e fintzas de profetos chi benint dae s’afitu de sos polìgonos a sos esèrtzitos de totu su mundu pro deghinas de mìgias de èuros a s’ora”.
Segundu sos portaboghes de sos movimentos indipendentistas, “s’ìsula nostra tenet su deretu de ischire a cale est su dèpidu de s’Istadu, non petzi pro una chistione econòmicu-sotziale ma fintzas pro una chistione de dignidade morale e de autopertzetzione colletiva e personale de sas sardas e de sos sardos, tropu s’ispissu ingiunchinados e autocumbintos de èssere in dèpidu e de èssere semper assistidos”.
“Non nos illudimus chi sas classes polìticas unionistas de Sardigna de de Còrsica siant de acòrdiu cun un’initziativa comente a custu– concruint -. Su còmpitu nostru oe est su de fòghere una proposta simpre e resonàbile. Una proposta de trasparèntzia e de democratzia in nùmene de su deretu a su connoschimentu, pensada e proposta paris a sos frades nostros corsos cun sos cales in austu amus a tènnere s’oportunidade de fàghere su puntu de sa situatzione in ocasione de sas “Ghjurnate internazionale” organizadas in sa tzitade de Corte dae Corsica Libera su 7 e s’8 de austu”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
