Su Cunsìgiu comunale de Casteddu at denegadu sa motzione presentada dae su cunsigeri de minoria Giuseppe Farris pro nche istesiare de s’istàtua de Carlo Felice dae pratza Yenne, cun s’idea de nche la tramudare in unu museu e de cambiare sa toponomàstica tzitadina. Sa discussione de belle un’ora e mesu, at bogadu a campu ideas diferentes intre sas fortzas polìticas, ma s’impedu prus mannu est istadu su pàrrere contràriu de sa Subrintendèntzia, chi at proibidu cale si siat ipòtesi de mudamentu.
In sa motzione sua, Farris at motivadu sa recherta ponende a notu comente su monumentu tzèlebrat unu soberanu chi sas atziones e ideales suos fiant contràrios a sos valores democràticos de sa Repùblica italiana. A bisu de su cussigeri, medas tzitades in Itàlia e in s’èsteru puru sunt torrende a valutare in manera crìtica monumentos postos in logos pùblicos dedicados a figuras istòricas ambigua.
Su sìndigu Massimo Zedda at torradu a nàrrere ca s’istàtua non faghet a nde la bogare de cant’est: “Amus pedidu a sa Subrintendèntzia e sa risposta est istada chi nono. Diferente imbetzes est s’arresonu de dèpere cuntestualizare in manera istòrica sa figura de Carlo Felice. Sas persones bident su monumentu, ma a s’ispissu no ischint chie fiat su personàgiu. Podimus dare a s’Universidade de Casteddu s’incàrrigu de redatare una descritzione sintètica pro informare sos tzitadinos”.
Tando Farris at modificadu sa motzione poderende su matessi tìtulu e proponende de collocare pannellos descritivos in sardu, italianu e inglesu pro ispiegare chie fiat Carlo Felice e sas cunsighèntzias de su guvernu suo. Su cunsìgiu comunale, però, at denegadu siat s’emendamentu siat sa motzione originale.
A Farris l’ant cunsigiadu de retirare sa motzione e de la torrare a presentare in manera diferente. “Custu cunsìgiu comunale est de mal’àsiu cun custu tema e no est prontu a l’afrontare. No apo a retirare sa motzione”, at rispòndidu. Pagu a pustis, in un’àteru puntu postu in s’òrdine de traballu, su “Riconoscimento Samudaripen”, Farris est intervènnidu torra, referende·si in manera crara a s’argumentu pretzedente chi pertocaiat Carlo Felice: “Voto in favore, ma sa majoria est tenende unu cumportamentu de fortza, aprovende sena pensamentos sos puntos propostos dae sa giunta, ma faghende a mancu de si cunfrontare cun sos de s’opositzione. Si pessades de sighire in custa manera, cos seis isballiende”.
Sa chistione nd’at pesadu unu muntone de discussiones mescamente in sas retes sotziales tra chie est a favore de nde pesare s’istàtua e chie est contràriu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
