Oe, 21 de freàrgiu, est sa Die internatzionale de sa limba mama, una tzelebratzione istabilida in su 1999 dae s’Unesco pro promòvere sa limba materna, sa diversidade linguìstica e culturale e su multilinguismu.
In su 2007 sa Die internatzionale de sa limba mama est istada reconnota dae s’Assemblea generale de s’Onu, paris cun sa proclamatzione de su 2008 comente a Annu internatzionale de sas limbas.
Sa data est istada seberada pro subènnere su 21 freàrgiu 1952, cando diversos istudiantes bengalesos de s’Universidade de Dacca sunt istados mortos dae sas fortzas de politzia de su Pakistàn (chi tando cumprendiat fintzas su Bangladèsh) durante sas protestas pro su reconnoschimentu de su bengalesu comente limba ufitziale.
Antonio Gramsci (1891-1937) in sa lìtera de su 26 martzu 1927 a sa sorre Teresina, iscriiat: “Franco mi paret ischidu e abbistu… In ite limba chistionat? Ispero chi l’ais a lassare chistionare in sardu … Pro mene est istadu un’isbàlliu su de no àere lassadu chi Edmea, a pipia, faeddaret in sardu sena impedimentos. Custu at nòghidu a sa formatzione intelletuale sua e at postu una camisa de fortza a sa fantasia sua. Non deves fàghere custu errore cun sos pipios tuos. Primu, su sardu no est unu dialetu, ma una limba a banda, e mancari no apat una literadura manna, est bonu chi sos pipios imparent prus limbas, si est possìbile. Posca, s’italianu chi bois l’ais a insegnare, at a èssere una limba pòbera… Ti racumando de coro de lassare chi sos pipios tuos suant totu su sardismu chi bolent e si pesent in manera ispontànea in s’ambiente naturale in ue sunt nàschidos: custu non lis at fàghere dannu, antzis, a s’imbesse”.
