Giru de pagas dies e su Cussìgiu regionale at a dèvere faeddare e deliberare in contu de fine vida. S’iter legislativu finas a como at interessadu sa commissione Sanidade e sa proposta at regortu unos 50 emendamentos, belle totu cantos de Fratelli d’Italia.
Como custa proposta cheret acumpangiada dae una relatzione tècnico-finantziària de s’assessoradu de sa Sanidade pro chi a pustis la vàlutet sa commissione Bilantzu. Fatu fatu devet torrare a sa commissione presèdida dae sa cussigera Carla Fundoni. Dae cue su passàgiu finale in Cussìgiu.
«Pro seguru – narat s’esponente de su Pd – custu est unu tema chi partzit, ma penso chi in commissione apamus fatu unu grandu traballu in unu clima de collaboratzione e de rispetu intre sos ischieramentos».
Est naturale, comente est acontèssidu in Toscana, chi una bia aprovada custa lege potzat èssere cuntestada e impugnada dae parte de s’esecutivu Meloni. Ma est pròpiu pro custu chi Fundoni narat chi «in custa norma b’amus postu unas cantas integratziones, pròpiu pensende a s’esèmpiu de sa Toscana».
A bisu de s’esponente dem «amus miradu prus a longu cunforma a custa ipòtesi»: «Pensamus chi – annanghet – comente vulnus abarret petzi su de su chie si depet ocupare de custu tema: su guvernu o sas regiones».
Ma sas paràulas de Fundoni pro su chi pertocat su clima de serenidade in commissione parent cuntrastadas dae sos faeddos de unos cantos esponentes de sas opositziones, chi narant: «Custu est unu tema prus chi non de importu – gasi Alice Aroni de is catòlicos de s’Udc e vitze presidente de sa commissione mentovada -, dìligu e sensìbile pro lu pòdere afrontare gasi a sa lestra, cun pagas auditziones. Fiat istadu mègius s’isetu de unu provedimentu guvernativu ca sa cumpetèntzia in matèria est istatale».
Ma giai l’ischimus chi su guvernu no est in idea de pònnere concruos a sa fatzenda.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
