Andat in sos sartos castiende matas e terrinos, pigat datos comente sa crèschida e sa cantidade de abba chi serbit. A pustis faghet s’anàlisi e proponnet ite serbit. Comente unu massaju espertu.
Su tzentru de chirca sardu Crs4 at progetadu unu robot chi at a èssere impreadu in su campu de s’agricoltura digitale. Est su resurtadu de su progetu “Smaart” (chi istat pro Sustenibilidade e gestione pro agricoltura e zootecnia de pretzisione cun abbistesa artifitziale, robot e tecnologias IoT) cun sa punna de compudare sas colturas e sas bestias de allevamentu pro cunsentire una pranificatzione de sos interventos.
Su robot, chi podet èssere intesu comente unu ‘laboratòriu de chirca biagiante’, dd’ant progetadu pro acumprire funtziones de compudu autònomu in agricoltura. S’obietivu est su de emulare su cumportamentu de un’òmine espertu chi castiat unu campu coltivadu, osservende sas prantas e identifichende ite tocat a fàghere contra maladias, atacos de parassitas infestadores, fartas ìdricas o de nutrimentu. A pustis de aere agatadu sos problemas, su sistema in deretura imbiat sas informatziones conca a telefoneddos e computer.
S’aparatu tenet sensores chi podent otènnere nues de puntos pro generare modellos 3D de arta risolutzione de sos fundos coltivados, a traessu de rapresentatziones virtuales pro imbiare informatziones dae tesu. At a èssere puru possìbile bìdere siat totu unu campu coltivadu o puru una pranta isceti aende istimas cuantitativas de s’istadu de salude, de paràmetros biomètricos, de caraterìsticas agronòmicas e àteru ancora.
“Como su robot est comente a unu pipiu chi at imparadu a caminare”, ispiegat Fabio Maggio chircadore de su CRS4, “nos tocat a l’imparare a ddu fàghere a solu, a traessu de algoritmos de abbistesa artifitziale chi dd’ant a permìtere de cumprèndere s’ambiente impreende sos datos chi arribbant dae sos sensores suos”. “Su disafiu tecnològicu est mannu: pro operare a solu, su robot at a dèvere impreare modellos de IA in deretura, siat pro sa classificatzione de sos perìgulos siat pro sa navigatzione intelligente. Su sistema at a collaborare fintzas cun drones dedicados”.
Sas solutziones tecnològicas istudiadas e perfetzionadas subra de su robot de su CRS4, posca ant a èssere trasferidas subra de unu robot ‘gemellu’ de s’Universidade de Tàtari, prus orientadu a sos tratamentos in campu a traessu de protzeduras de pretzisione.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
