Retzimos dae Assemblea Natzionale Sarda e publicamos sa nota de imprenta chi sighit.
Chenàbura su 28 de onniasantu, in su Teatru Comunale de Ìtiri Cannedu ddoe at a èssere unu sero dedicadu a Giuanne Fiore, poeta e iscritore chi dae annos meda arrichit sa literadura sarda cun una boghe lìmpia, poderosa e cun raighinas fungudas in sa comunidade sua. S’eventu l’ant ammaniadu Assemblea Natzionale Sarda cun s’Assemblea Territoriale de Tàtari, paris cun s’assòtziu Mela Bacata, cun su patrotzìniu de su Comunu de Ìtiri Cannedu.
Fiore, leva 1935, sighit a iscrìere cun grandu passione e fantasia. Sa poesia sua naschet dae s’esperièntzia de ònnia die e dae sa connoschèntzia de sa limba chi andat a intro de is istòrias, de is atzinnos e de is paràulas de su mundu agro-pastorale. Is òperas suas – dae sa prima regorta Camineras fintzas a sa imprentada dae pagu tempus – rapresentant unu patrimòniu linguìsticu pretziosu, fatu de faeddos e immàgines chi arriscant de si pèrdere.
Su sero cumintzat cun sa projetzione de su documentàriu “Il coraggio e la poesia”, fatu dae su regista Ignazio Figus. Su film contat de su percursu creativu de paritzos poetas sardos e sardas, e fintzas de Giuanne Fiore, e oferit una mirada forte subra su valore culturale de sa poesia in limba sarda.
A pustis, una mesa tunda cun Fiore e àteros protagonistas de su documentàriu. At a èssere unu momentu pro cumpartzire ammentos, meledos e ideas subra sa relatzione intre sa limba, s’iscritura e sa trasmissione culturale. Sa punna est a acurtziare is levas novas a sa poesia e a su sardu, mustrende sa richesa e s’ispipillesa de custa limba.
Su sero nos ant a acumpangiareis esibitziones de su coro “Bisos e Chertos” de Ìtiri Cannedu, chi ant a batire s’esperièntzia e is boghes issoro a cumpletare su contu.
S’atòbiu est pensadu pro tzelebrare su traballu de un’autore de importu, ma fintzas pro creare unu logu de ascurtu e partetzipatzione a inghìriu de sa limba sarda. Sa poesia si faghet gosi una manera pro si reconnòschere, pro ammentare e pro fraigare ligàmenes noos.
Informatziones in curtzu
- Die: 28 de onniasantu 2025
- Oràriu: 18:00 – 23:00
- Logu: Teatru Comunale de Ìtiri Cannedu, carrera XXV Aprile 59
- Intrada: de badas
