In intro de una chida polìtica prus chi non prena de allegas, comintzende dae s’iscenàriu nou internatzionale chi a interessare finamentas custos logos, b’at àpidu un’argumentu chi at covecadu belle totu su restu. Pro seguru gràtzias a s’abilidade polìtica de chie at bidu in antìtzipu su potentziale polèmicu e sa gerarchia cunsighente de sos temas in s’agenda de sas novas.
Su manifestu de Ventotene mentovadu dae sa presidente de su Cussìgiu Giorgia Meloni (mentovadu in parte e seberende su chi lu cumbeniat) est duncas su trending topic de custas dies. Sos passos mentovados dae Meloni contras a sos chi l’ant istèrridu pertocant s’economia sotzialista e sas modalidades de controllu de sa propiedade.
Passos istèrridos cando sas contradditziones de su capitalismu europeu aiant iscadenadu sa segunda gherra mundiale e cando su sotzialismu in Unione soviètica fiat semper prus burocràticu e semper prus pagu consiliare. Passos chi cherent analizados sena ricùrrere a su cherry picking e chi, pro su chi nos interessat como e inoghe, cherent inguarnissados in intro de s’architetura federalista pesada dae Altiero Spinelli e dae Ernesto Rossi.
Sende chi si narat chi est unu de sos testos fundadores de s’Unione europea (mancari pàrgiat atrividu a nàrrere “de custa Unione europea”), tocat a analizare custas rigas: «Sa lìnia de partzimenta intre sos partidos progressistas e sos reatzionàrios» est intre is chi «cuntzepint […] sa conchista e sas formas de su poderiu polìticu natzionale» e is chi ant «comente coòmpitu tzentrale su fràigu de un’istadu internatzionale forte». Is primos sunt mentovados comente pedinas «mancari involuntàrias» de sas «fortzas reatzionàrias».
Su de nàrrere est meda e non pertocat ebbia sos guvernos atuales ma fintzas sas natzione sena istadu de custa Europa. Chie est su reatzionàriu e chie s’europeista in custos cuntestos? Su chi cheret s’indipendèntzia dae s’istadu chi lu custringhet o s’istadu matessi chi bi l’impedit?
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
