Sighi∙nos

Salude, ite ses chirchende?

Cultura

In Orthullè sa de bintitrès editziones de su campionadu sardu de murra

Torrat su campionadu sardu de murra: sàbadu 27 de austu a ora de is 6 de merie, in Orthullè, sa de bintitrès editziones de su torneu. Sos finalistas ant a tènnere su deretu de leare parte a su Murramundo, su campionadu internatzionale de sos giogadores de murra de su Mediterràneu in programma pro s’annu chi benit.

In s’anfiteatru de pratza Funtana Bècia, suta su murale mannu rapresentativu de su giogu, sàbadu 27 de austu sos mègius giogadores e giogadoras de murra de sa Sardigna s’ant disafiare in su torneu, chi dae su 1998 faghet parte de sa traditzione de Orthullè. Si tratat de unu de sos apuntamentos prus de importu pro sos amantiosos de custu giogu, chi finas ocannu at a èssere organizadu dae s’assòtziu culturale ‘Po su Jocu de sa Murra’ in paris cun sa Proloco de sa bidda subramontina e de su comitadu Fedales ’72 de Orthullè.

Si giogat a còpias, sas primas bator classificadas s’ant a garantire sa partetzipatzione a su torneu Murramundo, sa cumpetitzione internatzionale, nàschida in Orthullè in su 2003, oe biagiante, chi riunit totu is mègius giogadores de murra de su Mediterràneru. Semper in su 2021, pro sos bint’annos, s’eventu at a torrare a Sardigna a pustis de sete annos e si previdet sa partetzipatzione de prus a mancu 20 delegatziones.

Sa murra est sa versione sarda de sa “morra”, chi tenet raighinas giai in s’antigu Egitu. Pro sutaliniare su caràtere lùdicu de sa manifestatzione, in Orthullè su sèberu de sos organizadores est semper istada sa de non dare prèmios in dinari: difatis sos primos in classìfica ant a èssere premiados cun sos produtos de s’artesania locale e cun duos crabos sanados.

Pro giogare a sa murra tocat a èssere lestros, bonos a cumprèndere sa betada de s’aversàriu. Si giogat duos a sa borta. Sos giogadores betant in su pròpiu momentu sos pòddighes e in su matessi momentu chircant de intzertare sa summa de sos didos betados, dae duos a deghe (murra). Chie intzertat sa summa balàngiat unu puntu. Pro ogna partida est prevìdida sa rivìntzita e un’eventuale ‘bella’. A.D


Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22

Attività realizzata col contributo della Regione Sardegna – IMPRENTAS 2021-2022. LR 22/2018, art. 22

De lèghere

Cultura

Si podet fàghere arte e tzìnema fintzas impreende unu telefoneddu. In su mundu nche sunt medas festival de tzìnema chi promovent pellìculas realizadas gràtzias...

Atualidade

Prus de 18 mìgias sardos ant lassadu s’Ìsula in sos ùrtimos tres annos. Una comunidade manna comente a su comunu de Pauli, comente sa...

Cultura

Si narat “La tua memoria è la nostra memoria”, su progetu aparitzadu dae su Comunu de Boruta chi punnat a sa realizatzione de un’archìviu...

Atualidade

Sa Sardigna est unu logu galu pagu connòschidu dae sos turistas. Belle su 80% de sos turistas chi arribbat in s’ìsula, difatis, bìsitat isceti su 10% de...