Unu mitu. Nemos at a èssere comente a isse, finas chi s’ispera est de ddu torrare a bìdere unu comente a Gigi Riva. S’òmine s’est mortu oe in Casteddu, teniat 79 annos. Una nova chi at betadu tristura in totu sa Sardigna e non isceti pro sos tifosos de fùbalu.
Pro ite Gigi Riva prus che un’òmine e unu giogadore (tenet su record de gol cun s’Italia) est istadu un’esèmpiu de contare a sos prus piticos pro ddis fàghere cumprèndere ca, in tempus de giogadores chi si bendent pro chentinas de milliones, su dinari non podet comportare a totus.
S’istòria de Riva est s’istòria de unu pitzocu nàschidu in Leggiuno (Lombardia) e arribadu a Sardigna in su 1963 cando teniat 19 annos. Comente fiat arribbadu fiat prontu a si nche torrare a domo: “Custa est s’Africa” aiat pensadu comente naradu tempus a pustis in un’intervista. E però cussa terra pòbera e ismentigada in pagu tempus pro Gigi Riva est divènnida domo.
“Nche mutiant pastores e bandidos in totu s’Itàlia e deo mi arrennegaia. Sos bandidos faghiant sos bandidos pro fàmene, ca tando b’aiat fàmene meda, comente a oe etotu a dolu mannu. Su Casteddu fiat totu pro totus e deo aia cumpresu chi non podia negare sas ùnicas ditzas a sos pastores. Diat èssere istadu lègiu a mi nche andare dae Casteddu, mancari totu su dinari de sa Juventus. A pustis de cada partida mi nde beniat Allodi chi mi naraiat “Telefonemus a Boniperti”. Ma deo no apo mai tentu duda e non mi nde so mai pentidu.
Custas paràulas naradas dae Riva nos faghent cumprendere comente aiat cumpresu sos sardos e pro ite aiat seberadu de abarrare cun cussos “pastores”. Riva dae su 1963 at coladu totu sa vida sua in Sardigna ue in su 1970 at donadu a su Casteddu s’ùnicu iscudetu de s’istòria sua: unu resurtadu istòricu pro s’isport sardu e italianu pro ite pro sa prima borta un’iscuadra de su Sud Italia binchiat sa Serie A.
Davide contra a Golia ant naradu medas bortas. Aici est istadu pro totu sa gente chi moviat dae sa Sardigna pro agatare traballu a su Nord e a s’ispissu fiat castiada a mala manera e posta a una parte. Cussa gente aiat tentu onore a bìdere su Casteddu bìnchere contra a sas iscuadras de sos meres: un bisu chi como fiat beru.
Rombo di Tuono, comente dd’aiat numenadu Gianni Brera, est resèssidu a devènnere unu sìmbulu de una terra. Est pro custu chi sa Regione at detzìdidu de li dare in su 2005 sa tzitadinàntzia onorària e in cuddu matessi die su Casteddu at retiradu sa màllia nùmeru 11, bestida dae Riva cando giogaiat.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
