Diamus pòdere comintzare elenchende sos datos eletorales, faeddende de sas votatziones autonòmicas de domìniga in Euskadi. Narende deretu chi b’aiat 75 deputados de elègere, chi de sos uscentes 31 fiant de su Partidu natzionalista bascu e 21 fiant de HE Bildu. E chi mancari cun una majoria de votos, sos natzionalistas tzentristas (su 35% e barda) si nche pigant 27 iscrannos gasi comente si nche nde leant sos indipendentistas de manca (chi pro pagu non lompent a su 33%).
Nemmancu de 30mìgia votos sa diferèntzia intre sa prima e sa segunda formatzione in òrdine de cunsensos. Su malu pro su Pnv est chi cunforma a bator annos a como nd’at pèrdidu prus de 20mìgia cando chi Bildu marcat unu + 92mìgia e barda. Duncas no est a contare s’afluèntzia de su 2020 ebbia chi, in pandemia prena, fiat prus bassa de prus de 9 puntos pertzentuales. Sos datos de domìniga mustrant una crèschida se sa manca de s’autodeterminatzione a dannu de s’autonomismu burghesu (chi in Europa si nche setzet in pare cun sos “sorianos” de Azione e de Italia Viva). E a dannu de àtere.
Ca est una crèschida de manca radicale chi non permitit alternativas in su matessi campu, comente est craru dae s’ùnicu sègiu de Sumar (3,3%). Podemos, imbetzes, non leat su tantu netzessàriu e cun su 2,2% abarrat in foras de s’assemblea. Allega a banda meresset sa manca riformista de su Pse chi, cun su 14,2% e cun 12 iscrannos, at a dare su contributu suo no a sa manca de Bildu ma (torra) a sos tzentristas de Pnv pro formare su guvernu autonòmicu.
Sas eletziones cunfrimant però unu datu a livellu istatale: sas fortzas indipendentistas de manca, sende chi b’at crisi manna in sa manca republicana federale de Izquierda unida e de Podemos, sunt rapresentende, a su nessi pro como, sa mègius barrera contra a sa dereta. Gasi est pro su Bloco nacionalista in Galìtzia e pro s’Esquerra republicana in Catalugna. Formatziones chi, in pare cun Bildu, ant a torrare a propònnere su cartellu Ahora republicas! pro sas europeas imbenientes. Conca a su gruppu birde.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
