In Casteddu totu is limbas de su mundu. Torrat su Babel film Festival

Torrat in Casteddu su Babel Film Fèstival, su primu cuncursu tzinematogràficu internatzionale destinadu a sas produtziones chi contant sas minorias linguìsticas. Sa de ses editziones de sa rassegna s’at a tènnere dae lunis 2 a sàbadu 7 de su mese de nadale, cun anteprimas su 28 e 30 de santandria e 1 de nadale.

Sunt ultres 120 sos film arribados dae totu su mundu, pro ultres 31 oras complessivas de projetzione. Una maratona chi at a cumentzare dae su merie in sa sala de sa Cineteca Sarda in s’arburada de Trieste 126 in Casteddu, pro sighìre su sero a Sa Manifattura in s’arburada de Regina Margherita. Prevìdida annotamala una die de mùsica e tzìnema in sa sala Nanni Loy, in sos ispàtzios de s’Ersu in bia Trentinu, e una sèrie de 5 workshop a sa Mem de bia Mameli.

At a èssere unu fèstival ricu de anteprimas natzionales e ant a èssere meda sos momentos de tzìnemas ligados a s’atualidade. Meda sunt sos film faeddados in kurdish e chi contant su dramma de sos curdos. No at a mancare puru s’atualidade catalana. Sunt imbetzes 5 sos film in cuncursu pro su prèmiu prus importante de su Babel Film Fèstival: s’inèditu in Itàlia ‘We will be happy one day’ de Pawel Wysoczański (Polònia 2011); ‘Los ojos del camino’ de Rodrigo Otero Heraud (Perù 2017); Oreina de Koldo Almandoz (Ispagna 2018). E infines duos traballos sardos: ‘La kora’ de Gianfranco Mura (Itàlia, 2018), chi esplorat su mundu de sa mùsica ètnica sonada dae unu mùsicu africanu in sa marina de su Poetto de Casteddu; e ‘A bolu’ de Davide Melis (Itàlia 2019), unu documentàriu chi contat su càntigu a tenore.

Anteprimas. Su fèstival at a èssere introduidu dae una pariga de atòbios partinde dae giòbia 28 de santandria, cando ant a èssere presentados sos duos film naschidos dae sos progetos binchidores de su cuncursu Kentzeboghes, su primu cuncursu pro progetos tzinematogràficos in sas limbas e dialetos de sa Sardigna. ‘Bar Seui’ de Andrea Deidda (in sardu campidanesu) e ‘L’ultimo barbiere di Carrera Longa’ de Antonio Maciocco (in tataresu). Tra sas anteprimas b’at puru Casteddu Sicsti, s’ùrtimu traballu de su regista casteddaju Paolo Carboni, unu docufilm: contat su cabulogu sardu a sa fine de sos annos ‘60. Su film – una produtzione Babel – est unu donu a sa tzitade de Casteddu chi acasàgiat su fèstival: tres becios amigos s’atobiant in nd’una barberia, e ammentant sa gioventude issoro in sos ùrtimos annos ’60. Sa projetzione s’at a tènnere domìniga 1 de nadale a sa Manifattura partire dae sas 21.

Su fèstival est promòvidu dae sa Sotziedade Umanitària – Cineteca Sarda de Casteddu in paris cun sa Fundatzione Sardigna Film Commission e s’Assòtziu Babel, pro sa diretzione artìstica de Antonello Zanda, Tore Cubeddu e Paolo Carboni.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.