Un’oportunidade pro parare fronte a su spopolamentu e torrare a pesare sos burgos abbandonados de sa Sardigna. Su Comunu de Masuddas, pagu prus de milli abitantes in su territòriu de Aristanis, presentat sa candidadura sua e pedit a tzitadinos, impresas e assòtzios de leare parte a un’addòbiu pùblicu pro organizare unu progetu cumpartzidu.
Sa Regione difatis at publicadu un’avisu pro seberare unu progetu de rigeneratzione culturale, sotziale e econòmica de sos burgos abbandonados e a arriscu abbandonu, finantziadu cun su dinari de su Pnrr, su pranu natzionale cuncordadu pro torrare a fàghere partire s’economia a pustis de sa pandemia de su virus Corona.
“Creimus chi su coinvolgimentu de sa populatzione siat sa base pro partetzipare a custu bandu” faghet ischire s’amministratzione: “Su tzentru istòricu de Masuddas tenet totu sos recuisitos pro partetzipare a sa manifestatzione de interessu” sutalìniant.
S’avisu, dedicadu a burgos piticos chi tenent màssimu 300 domos, bolet promòvere progetos pro sa rigeneratzione, valorizatzione e gestione de su patrimòniu de istòria, arte, cultura e traditziones chi custas biddas tenent. Paris cun s’obietivu de amparare su patrimòniu culturale, sa punna est de promòvere sa crèschida sotziale e econòmica chirchende de parare fronte a su spopolamentu.
Su Ministeru de sa Cultura ponet a disponimentu dinari pro finantziare unu progetu pro ogna Regione de Itàlia. A su mègius progetu at a andare 20 milliones de èuru. Sos Comunos chi bolent presentare dimanda ddos podent fàghere finas a su 2 de freàrgiu 2022. Inoghe su ligàmene pro nde ischire de prus: https://www.regione.sardegna.it/j/v/2568?s=431811&v=2&c=3&t=1
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
