Sighi∙nos

Salude, ite ses chirchende?

Atualidade

Eletziones sardas. Binchent Todde, su bipolarismu, s’alternàntzia e s’astensionismu

E nemos at a mudare sa lege eletorale

At bìnchidu Alessandra Todde, ma in antis de faeddare de custu cheret chi nos firmemus a fotografare sa Sardigna chi nd’est essida a campu in custas oras. B’est chertu su lunis mangianu pro ischire su datu generale de s’afluèntzia a sas 22; no amus bidu projetziones; in sos telegiornales de eris trasmìtidos a banda de sero fiat galu su “testa a testa” sa nova de contare.

A concruos de totu sa candidada de su Campu largu at otènnidu belle 3mìgia votos in prus de su sìndigu de Casteddu, unu +0,4%. Sa diferèntzia no est meda. A 1824 de 1844 setziones iscrutinadas (o mègius, de datos carrigados) Todde marcat 331.007 votos cando chi sas listas suas nd’ant leadu 290.640 (su 42,6%). Diferentes sos càrculos pro Paolo Truzzu chi leat prus pagos votos (328.241) de sas listas suas (333.612, su 48,8%). In pràtica belle sa metade de sos chi sunt andados a votare ant seberadu formatziones de tzentru-dereta.

Custu cheret nàrrere chi b’at un’orientamentu magioritàriu de tzentru dereta in Sardigna? Nono, si pensamus chi su Campu largu, sa Coalitzione sarda e Sardegna R-esiste sunt sotut cantos de tzentru manca. Si summamus sos votos a sas listas de custas tres cumponentes otenimus 349.217 votos (15mìgia de prus). Si summamus sos votos de sos candidados presidentes (ma custa est un’àtera chistione, finamentas pro more de su votu isgiuntu) otenimus su 54%.

S’arresonu podet èssere fartosu, ma isterrende·lu in sa mesa podimus bìdere chi non b’at faddina manna a faeddare de universu cumplessivu de tzentru manca. De su restu: Lucia Chessa est sa ghia de RossoMori, unu partidu riformista autonomista; duos de tres de Vota Sardigna ant fatu parte unu de un’alleàntzia orgànica cun su Pd (iRS) e unu de sa mesa de su Campu largu finas a su mese de santugaine (ScS); sos de LibeRU ant fatu parte de su Campu largu dae sa primu ora e fintzas cun Todde b’ant fatu paris dibatas pùblicas.

Duncas sa derrota de sa dereta b’est e sa presèntzia de Renato Soru (chi non lompet a su tantu netzessàriu, ma at semper leadu s’8%) no at impedidu a su Campu largu de bìnchere. Gasi comente sa presèntzia de Michela Mùrgia deghe annos a como (cun Soru chi tando eja chi faeddaiat de votu ùtile) no impedeit a Pigliaru de bìnchere contra a Cappellacci.

Tres cosas – ligadas a pare – parent seguras: su bipolarismu malu a si nche mòrrere; s’alternàntzia; sa lege eletorale chi nemos at a mudare. E su criu de s’allega democràtica nch’est totu inoghe. Cun s’astensionismu chi faghet de guarnissa.


Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018

De lèghere

Cultura

S’Ars Artium Editrice e s’Assòtziu “Forma e Materia” annùntziant s’inghitzu de sa de chimbe editziones de su cuncursu literàriu “Faraglioni d’Ogliastra”, chi tenet sa...

Atualidade

In Putzu Idu Assemblea Natzionale Sarda at organizadu sa prima letzione de Yoga in limba. Cantas bias s’intendet nàrrere: “Su sardu non faghet a...

Cultura

Sighit mèrcuris su 17 in Lodine e giòbia su 18 de trìulas in Urtei (a pustis de s’esòrdiu de Iscanu e de sa segunda...

Cultura

Unu documentàriu subra de sa pratza IV Novembre e unu videoclip cun su tìtulu “Ombre sull’asfalto”. Sunt sos progetos finales de sos laboratòrios Kuntralab...