Su 28 de abrile est sa die nòdida seberada dae sa Regione Sardigna su 14 de Cabudanni de su 1993 comente festa de su pòpulu sardu. Est istada istituida pro ammentare sa rebellia de su 28 de abrile de su 1794, cando su vitze-re Balbiano, paris cun sos àteros amministradores continentales, si nche fiant dèpidos andare dae Casteddu e dae sa Sardigna. Difatis sos sardos cheriant unu cussìgiu de Istadu issoro, sa sede de su vitze-re e unu ministèriu pro sos afares de sa Sardigna in Torinu, ma sos piemontesos no aiant atzetadu nudda de totu custu, e pro cussu b’aiat àpidu s’atu de rebellia populare chi fiat acabbadu cun sa tucada de su vitze-re chi però, pagu tempus a pustis, fiat torradu a su logu suo, ca l’aiant torradu a mutire sos nòbiles sardos etotu.
Ma torramus a coa. Cun sa crèschida de su discuntentu in sos cunfrontos de s’amministratzione piemontesa, in sas ùrtimas dècadas de su Setighentos si fiat istantargiadu unu movimentu rivolutzionàriu chi aiat rugradu totu s’ìsula, in manera sìmile a sos eventos rivolutzionàrios frantzesos e a sos fermentos nàschidos in vàrias alas de Europa (Irlanda, Polònia, Bèlgiu, Ungheria, Tirolu). In su 1793 una flota frantzesa aiat intentadu de leare possessu de s’ìsula longu duas lìnias, una in su territòriu de Casteddu e s’àtera in s’ìsula Maddalena, ghiada dae su giòvanu ufitziale Napoleone Bonaparte. Sos Sardos però aiat pderadu e firmadu su pianu de invasione frantzesu. Duncas aiat cumintzadu a crèschere in s’opinione pùblica unu sentimentu de revesa in sos cunfrontos de sa Corona sabàuda chi non fiat istada capassa de defensare de Sardigna dae sos invasores.
DE SU MATESSI ARGUMENTU: Sa Die: su chi depes ischire si ses sardu (o istas in Sardigna)
Sos sardos aiant pedidu difatis chi s’esseret riservada a issos sa parte prus manna de sos impreos tziviles e militares e un’autonomia majore respetu a sas detzisiones de sa classe dirigente locale. Ma su guvernu piemontesu no aiat atzetadu peruna rechesta, e sa burghesia tzitadina isulana, tando, aiat ammaniadu cun s’agiudu de su restu de sa populatzione, su motu insurretzionale.
Difatis tempus prima una delegatzione formada dae 6 rapresentantes de sos istamentos (su parlamentu isolanu), in rapresentàntzia de sa Natzione Sarda, fiat lòmpida a Torinu pro otènnere dae su Re s’aprovatzione de sas “Chimbe Preguntas”, unu documentu chi depiat serbire a megiorare unu pagu sa situatzione sarda. Ma su vitze-re aiat imbiadu a su re piemontesu una lìtera in ue bi fiat iscritu chi sas “preguntas” e s’òrganu chi las aiat iscritas (sos Istamentos), cun cussa iscusa, cheriant instaurare s’autoguvernu de sa Sardigna.
VÌDEO: S’ispetàculu de sa Die: cando Casteddu nche aiat bogadu is piemontesos pro sa de duas bortas
Su re duncas detzidet de non retzire deretu sos deputados sardos, ma de los fàghere abarrare in Torinu pro paritzu tempus, a ispesas issoro, sena lis donare udièntzia. Colados una pariga de meses, su re los retzit a corte, ma non lis donat peruna isceda. In s’ora però su ministru Graneri mandat a su vitze-re una litera a nùmene de su soberanu in ue bi fiat iscritu chi sas 5 dimandas non fiant istada aprovadas.
Su vitze-re incumintzat a fàghere pònnere in presone totu sos chi aiant partetzipadu a iscrìere sas dimandas; a mesudie de lunis, su 28 de Abrile 1794, fiant istados arrestados medas capos sardos de su gosi mutidu “partidu patriòticu”. Pagas oras a pustis cumentzat sa Sarda Rivolutzione, chi at a durare pro tres annos. Totu su pòpulu, sos possidentes e medas de sos istamentàrios armados, intrant in Casteddu e in una chida ebbia prus de 500 piemontesos fiant istados acapiados, carrados, imbarcados e ncumandados in Terramanna. Pro custu in Casteddu custa die est ammentada che “Die de s’atzapa”, tzelebrada a manera ufitziale dae sa Regione Autònoma de Sardigna cun su nùmene “Sa Die de sa Sardigna”.
Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
