Bona Die de sa Sardigna totus.
Gràtzias, ais a nàrrere.
Gràtzias a tie puru, ais chèrrere intèndere.
Ma est su mudìmene.
Mancari chi ocannu sa Regione si siat treulende pro fàghere missas in sardu (ma solu in parte), corteos de launeddas, cantadas in Cunsìgiu, arresonos subra de sa “sarda rivolutzione”, rapresentatziones de sa “sarda rivolutzione” deo intendo solu su mudìmene.
Iscolas serradas, pitzinnos in domo.
Ma perché oggi sei a casa?
E cosa ne so.
Ma oggi è “sa Die de sa Sardigna”.
E sticazzi.
Cantos pitzinnos pigant parte a sa festa? Pagos. Cantos ischint pro ite oe sunt in domo? Pagos meda.
E tando a ite serbit a serrare sas iscolas e rapresentare s’istòria si dae custa istòria semus foras, si in custa istòria nostra semus istràngios nois etotu?
Deo no isco a ue semus andende ma provo a cumprèndere su mundu chi m’inghìriat. Bio sa cussèntzia de sos sardos istudendesi, sa cultura nostra furriada a brulla, a istrochidura. Non bio una istrategia, una visione.
Faghende una anàlisi seria de s’istadu de sa cultura nostra in custa Die casi bella e importante, creo chi bessant a campu duas chistiones chi non faghet prus a cuare.
A un’ala mancat in sos sardos una cussèntzia seria, frutu de su resonamentu, de unu istùdiu, nàschia in su sinu de una sotziedade cumpria, forte, capatza de fraigare su tempus benidore subra de su passadu sua sena de fantasias, sena de eroismos frassos o prantos istèricos de subalternidade. A s’àtera ala sa cosa peus est ca non b’at una prospetiva. Onni cosa est fata pro assentare su bisòngiu de su momentu, onni cosa serbit a prènnere sa brente de chie papat oe. Cras s’at a bìere.
Su colore ruju pro sa festa de Sa Die, in Casteddu
Sa conseguèntzia de custas duas mancàntzias mannas est su mùdìmene e su disinteressu de pitzinnos e mannos, israighinados, postos a sicare a su sole, sena abba, sena nutrimentu, sena tempus benidore. Custos sardos de oe, atesu mannu dae festas de identidade, podent bìvere in Sardigna comente in cale si siat logu, ca tantu contat solu sa cortiledda a presu de domo. Custos sardos chi s’arrennegant cun su Gabibbo, ma abarrant mudos cando fraigant bombas e avelenant sa terra insoro sunt sos sardos de sa Die de oe.
Archiviu: Sa Die, torramus a coa a su 1794 pro cumprèndere ite balore tenet oe
Issaras, prima de fàghere missas e rapresentare s’istòria diat a tocare a fraigare unu orgòlliu chi s’est pèrdiu, a fraigare una cussèntzia romàntica, a istimare torra custa terra, a pònnere alas a sas raighinas, pro imparare a bolare ischende semper dae ue e pro ite.
Bona Die, a dda cheret e chie nono, a chi no ischit ite est e a chie dda festat cun sa manu in su coro.
Bona Die chi diat a dèpere èssere onni die.
Bona Die sena die.
Subra su matessi argumentu: Sa Die: su chi depes ischire si ses sardu (o istas in Sardigna)
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
