Est una novidade manna pro unu logu in ue a s’ispissu giustìtzia non b’at e nen sa Costitutzione b’intrat. Ca a custu giru sa Corte costitutzionale at naradu chi emmo a s’afetividade e a sa sessualidade in galera.
De custa manera, cun custa medida, est illegìtimu s’artìculu 18 de s’ordinamentu penitentziàriu chi, in su de tres commas, custu narat: «Sos collòchios cherent fatos in locales apòsitos cun su controllu visivu e no auditivu de su personale de custòdia». Cale diritu a s’afetividade podet èssere garantidu pro mèdiu de un’ordinamentu invasivu e cun s’ogru de sas guàrdias bene puntadu?
«S’ordinamentu giurìdicu – leghimus in su comunicadu imprenta relativu a sa sentèntzia 10/2024 de sa Corte – tutelat sas relatziones afetivas de sa persone in sas formatziones sotziales in ue issas si manifestant, reconnoschende a sos sugetos ligados dae cussas relatziones sa libertade de bìvere in prenu su sentimentu de afetu chi nd’est essèntzia».
Duncas peruna previsione «astrata e generalizada» chi annullet custa libertade. Duncas peruna previsione «insensìbile a sas cunditziones individuales de sa persone detènnida e a sas prospetivas de sa torrada sua a sa sotziedade».
De prus. Si faeddat de persones, non de persones cojuadas ebbia, e nemmancu de còpias de òmine e de fèmina. Duncas, a livellu implìtzitu semus bidende reconnotu custu diritu a s’afetividade e a sa sessualidade finamentas a sas còpias fatuales e omosessuales.
Gosu mannu intre sos de s’assòtziu Antigone chi fiant parte de de su protzedimentu pro more de un’atu de interventu issoro. «S’afetividade e sa sessualidade non sunt prus unu tabù, ma como cheret chi custu diritu siat efetivu. Gasi est chi nos acurtziamus a àteros Paisos chi dae tempus ant prevìdidu custa oportunidade in sos ordinamentos issoro».
Custa sentèntzia non pertocat sos chi sunt in regime de 41-bis.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
