Sas pesadas de su 1820-21 ant mustradu chi s’òrdine restauradu non podiat non cunsiderare sa cumplessidade natzionale e sotziale ingendrada dae su protzessu rivolutzionàriu frantzesu, finamentas in s’involutzione sua. S’Europa de su 1815 non podiat èssere sa matessi de su pre-1789. Pro chi sos guvernantes mantennerent s’òrdine sos patriotas de su continente ant sufridu interventos militares, presonia e emigratzione.
A pustis de sas pesadas de su 20-21, duncas, sa repressione iscurigheit sas framas de chie punnaiat a sos deretos liberales e natzionales. Coladu unu deghènniu agatamus pesadas noas, de grandu importu che a sa de Frantza a su puntu de la mutire “segunda rivolutzione frantzesa”. A caddu, in Parigi, bi fiat Charles X, conte de Artois. Nche lu setzeint su 1824, a sa morte de su frade Louis XVIII, e lestru mustreit su disìgiu suo de nche torrare a regime betzu de sa monarchia assoluta dende privilègios a su cleru e a s’aristocratzia. Una lege famada sua est sa de Su Miliardu, emanada pro intregare rifata a sos nòbiles disterrados in tempos rivolutzionàrios. De prus, movende dae s’assentu suo reatzionàriu e imperialista, revocheit sa Costitutzione chi su frade cuntzedeit su 1814 e apronteit sa conchista de s’Algeria.
Totu custu cajoneit una grandu protesta, amplificada finamentas dae una crisi econòmica. Pèrdida sa fidùtzia in Parlamentu, Charles X emaneit bator decretos limitende su deretu de su votu, escruende sa burghesia, annullende sa libertade de imprenta e inditende eletziones noas a pustis de àere isortu s’assemblea legislativa. Su pòpulu pariginu non tardeit a si pesare in sas “tres dies gloriosas” suas (su 27, su 28 e su 29 de trìulas) custringhende su re a debodare e a si nche fuire in Inghilterra. Est tando chi incarrigheint a Luois-Philippe de Borbone, aristocràticu a costàgiu de sos rivolutzionàrios cun mentalidade burghesa, comente re nou. Issu, non prus re pro deretu divinu, praticheit una monarchia costitutzionale sena la cuntzèdere issu sa Carta ma ponende·si de acordu cun su Parlamentu.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22 Attività realizzata col contributo della Regione Sardegna – IMPRENTAS 2021-2022. LR 22/2018, art. 22
