Cun una motivatzione articulada e dettagliata de bene 65 pàginas, su Tribunale de Casteddu, presididu dae su giùighe Gaetano Savona, at denegadu su ricursu presentadu dae sa guvernadora sa Regione Sardigna, Alessandra Todde, contra s’ordinàntzia de decadèntzia emìtida dae sa Cummissione eletorale de garantzia. Sos giùighes de su cabulogu sardu ant trasmìtidu s’ordinàntzia a su Cussìgiu regionale, chi si depet detzìdere pro decadèntzia, tenende contu de sos inditos cuntènnidos in su providimentu.
Sa sentèntzia cunfirmat una santzione pecuniària de 40 mìgia èuros pro irregularidades cumproadas in sa presentada de sos torracontos de sas ispesas eletorales.
Su collègiu de sa prima setzione tzivile, duncas, at istabilidu chi sa cumpetèntzia pro sa decadèntzia de Todde cumpetet petzi a su Cussìgiu regionale. Su Tribunale at cunfirmadu s’atzertamentu de sas violatziones in matèria de ispesas eletorales, ma at postu a craru chi est su Cussìgiu regionale, tenende contu de sas irregularidades cumproadas, chi depet detzìdere.
Sas violatziones pertocant sa mancada aberidura de unu contu currente dedicadu pro sa regorta de sos finantziamentos destinados a sa campagna eletorale e s’ausèntzia de unu mandàriu eletorale, elementos netzessàrios pro garantire sa trasparèntzia de sos finantziamentos .
A pustis de sa sentèntzia, Alessandra Todde at declaradu in sos canales sotziales cosa sua: “A diferèntzia de chie sèberat s’iscontru cun sa magistradura, nois respetamus su ruolu de sos giùighes e sas detzisiones issoro, fintzas cando non las cumpartzimus, comente in custu casu. Etotu ca creamus in s’Istadu de deretu, chi previdet tres grados de cabu, tengiamus su deretu e dovere de nch’amparare in su protzessu, no de su protzessu. Duncas andemus a in antis: impugnamus sa sentèntzia, ca sas violatziones cuntestadas non sussistent” .
Su futuru polìticu de Alessandra Todde dipendet como dae sa detzisione de su Cussìgiu regionale e dae sa Corte Costitutzionale, chi su 9 de trìulas discutit sa cuntierra de atributzione pesadu dae sa Regione Sardigna contra s’Istadu in mèritu a sa lege natzionale chi regulat sos casos de decadèntzia pro sos amministradores. Sa Corte at a dèvere acrarire si sa lege natzionale impreada dae sos giùighes de su collègiu eletorale pro decretare sa decadèntzia de sa Todde fatzat a l’aplicare a una regione a istatutu ispetziale comente est sa Sardigna.
A sa noa de su denegu de su ricursu de su Tribunale, s ‘opositzione at pedidu deretu sas dimissiones de sa presidentas, mentras sa majoria de tzentrumanca at dadu fidùtzia a Todde, sutaliniende sa netzessidade de abetare sa detzisione de su Cussìgiu regionale e s’èsitu de su recursu a sa Corte Costitutzionale.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
