Ant trasformadu su dolore issoro in amore. E pro ddu fàghere ant acuntentadu etotu su disìgiu de Giulia (iscumparta a feti 10 annos pro more de unu tumore a su cherbeddu) su de agiuare sos pipios prus pagu fortunados. E gasi sa mama e su babbu de sa pitzinna, cun s’assòtziu de issos fundadu – “ Il sogno di Giulia Zedda *odv” – ant cunsignadu a sa Pediatria de s’ispidale Aou de Tàtari unos cantos mòbiles ùtiles a arredare un’aposentu.
A acasagiare sos arredos noos no est però un’aposentu cale si chi siat de su repartu a su segundu pranu de su Maternu infantile, ma est su “Aposentu 1” sa chi in diversas ocasiones at acasagiadu etotu Giulia.
Sa donatzione fata at rapresentadu unu ringratziamentu a s’istrutura dirìgida dae su professore Roberto Antonucci. “Semus istados acollidos comente a in una famìlia e nch’ant fatu intèndere bene”, narant Eleonora Galia e Alfio Zedda. Su pensamentu issoro andat in deretura a sa pitzochedda. “Giulia nostra nch’at insegnadu meda – sighint – fintzas a tènnere fede in modu diferente, autènticu”.
“S’aposentu suo”, s’Aposentu 1, como disponet de arredos noos e colorados: un’armàriu, una mesa, duas cadreas, duas poltronas-letu, unu comodinu e unu televisore.
E lu sutalìniat fintzas su diretore de s’istrutura de Pediatria. “Nois bi ringratziamus pro su gestu bostru – agiunghet professore Antonucci – chi agiudat a sos bisòngios de sos ispidales comente a su nostru”. A acollire sa mama Eleonora, su babbu Alfio e sas voluntàrias de s’assòtziu, ultres a su diretore de s’istrutura, fiant presentes dotores, specializandos, Oss, infermieras, sa caposala Anna Maria Zara e sa dotora Anna Maria Marinaro, custa ùrtima aiat sighidu sa pitica Giùlia durante sas vàrias fases de su ricòveru tataresu.
S’assòtziu, cun sede in Casteddu, at lassadu in prus fintzas unas cantas còpias de unu giornaleddu a colores chi ammentat Giùlia, nàschidu pro èssere coloradu dae sos piticos de s’iscola in ispidale. Etotu cudda iscola chi sa pitzinna aiat pòdidu frecuentare durante sos ricòveros suos.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
