“Non bolimus èssere serbidos dae cuddu”. Cuddu est Mamadou Niang, camereri de 18 annos de orìgine senegalesa, chi bivit e traballat in Gonone, localidade turìstica de Dorgali in su Nugoresu. S’episòdiu de ratzismu est istadu contadu propiu dae Mamadou a unu giornalista de Videolina e dae su propietàriu de su tzilleri chi at istesiadu sos clientes, bator pitzoccos sardos. “Una birra, pro praghere. Ma non bolimus chi nche dda donat cuddu camereri”, ant naradu sos bator. “Non nche bolia crèere”, narat Dionigio Mereu Fronteddu, su titulare. “A sa fine, però, los apo imbidados a foras dae su locale. Inoghe non faghimus distintzione pro su colore de sa pedde, isceti intre bonos e malos”.
Mamadou Niang, sa die in antis cummentat aici in facebook su chi est acontessidu: “Torro gratzias a totus pro sa solidariedade ammustrada – iscriet – custu fatu no at a cambiare nudda, deo apo a èssere semper su matessi. No apo a cambiare mai. Gràtzias àncorat”. S’istòria est istada publicada puru dae sos giornales de Italia etotu e Mamadou at retzidu solidariedade de meda gente chi dd’ant iscritu messagios in facebook.
