Comente amus naradu s’artìculu coladu, sàbadu s’8 e domìniga su 9 de làmpadas b’ant a èssere sas eletziones pro su rennou de su Parlamentu europeu. Oe, comente amus a bìdere in sos àteros artìculos, custa est s’ùnica istitutzione continentale elègida in forma direta dae sos tzitadinos de sos istados membros. Ma b’at chertu tempus pro lòmpere a custu èsitu.
Su 1958 nascheit s’assemblea parlamentare europea cun sede in Frantza, in Istrasburgu, tzitade sìmbulu de sa paghe francu-tedesca. Fiant 142 sos deputados in rapresentàntzia de sos paisos fundadores de sa Comunidade europea: Bèlgiu, Frantza, Germània, Itàlia, Lussemburgu e Olanda. A custos 142 membros nemos los at elègidos, ca fiant imbiados dae sos parlamentos natzionales (incàrrigu dòpiu, duncas, duas bias parlamentares).
Su primu addòbiu issoro, presèdidu dae su ministru de sos afàrios èsteros frantzesu Robert Schuman, tenet sa data de su 19 de martzu de cussu annu. Sos poderios de s’assemblea, tando, fiant limitados, consultivos ebbia e non detzisionales. E difatis custa assemblea fiant consultada dae sa Commissione europea e dae sos Paisos membros.
Bator annos a pustis, su 1962, a s’organismu li mudant su nùmene in Parlamentu europeu, ma galu est cun sos poderios betzos sena nd’àere otènnidu àteros. B’at de nàrrere chi su 1973 sos paisos colant dae 6 a 9 cun s’annanta de Danimarca, Irlanda e Rennu unidu.
Petzi su 1979 su Parlamentu comintzat a èssere elègidu interessende 180 milliones de tzitadinos de sos noe mentovados. Est s’annu de sas primas votatziones europeas, cun s’abertura de sa prima legisladura (cuincuennale, finas a su 1984), cun sa subravìvida de Auschwitz Simon Veil presidente e cun 81 europarlamentares italianos de 410 in totu.
Duos sos sardos: Giosuè Ligios de sa Democratzia cristiana (vitzepresidente de sa Commissione pro s’agricultura e membru de sa delegatzione pro sas relatziones cun sos Paisos de s’Amèrica latina) e Umberto Cardia de su Partidu comunista (membru de sa cummissione pro sos trasportos e de sa delegatzione pro sas relatziones cun su Giapone).
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
