Torrat sa pista sarda de su mustru de Firenze, intre sas ipòtesis giuditziàrias de s’indàgine subra de su primu serial killer de s’istòria italiana. Dda contat su regista Stefano Sollima chi cun sa sèrie Il Mostro – si podet bìdere in Netflix – afruntat sas orìgines de sa chistione, sas primas indagines e sas umbras chi in sos annos ant ligadu sa Sardigna a sas pitzocas e pitzocos ochidos in sos sartos toscanos intre su 1968 e su 1985.
Seighi mortores, deghessete annos de terrore, semper sa matessi pistola: una Beretta càlibru 22. Sa sèrie de bator puntadas sighit sos protzedimentos penales galu ogetu de chistiones e sèberat de contare non petzi sos fatos ma fintzas sos “mostros possìbiles”: òmines e fèminas chi, in su tempus, si sunt agatados suspetados. Pruschetotu duncas sas personas ogetu de sa sèrie sunt Stefano Mele, Giovanni Mele, Francesco Vinci e Salvatore Vinci.
Segundu sa ricostrutzione de sa “pista sarda” sos mortores non diant èssere òpera isceti de unu manìacu, ma de unu grupu de persones ligadas intre issas dae raportos de famìlia, ricatu e pòdere in parte acapiadas a ambientes de sardos disterrados in Toscana. Isceti a sa fine de sa sèrie benit mentovadu su massaju toscanu Pietro Pacciani faghende pensare gosi a unu svilupu de s’istòria sua in un’àtera istajone de sa sèrie.
Intre sos atores figurant meda sardos: Marco Bullitta, Valentino Mannias, Francesca Olia, Liliana Bottone, Giacomo Fadda, Antonio Tintis e Giordano Mannu. Atores sardos chi donant boghe a un’istòria in cale s’ìsula no est isceti un’ipòtesi de indàgine ma finas parte de su contu. Presente, pagu però, finas sa limba sarda chi diat àere meritadu unu tretu prus mannu.
Sa sèrie, presentada a sa de 82 Mustras de su Tzìnema de Venètzia naschet dae un’idea de Leonardo Fasoli e Stefano Sollima, prodùida dae The Apartment (grupu Fremantle) e AlterEgo, cun sa produtzione de Lorenzo Mieli, Sollima e Gina Gardini.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
