Chi non dd’as mai bitu, est tempus de castiare “Sa règula” Su film est in limba sarda e faeddat de unu maistru de iscola elementare chi chircat de pesare fìgiu suo cun un'identidade e cun valores de cultura sarda

Chi non dd’as mai bitu ascurta: ‘Sa Règula’ est unu film bellu meda de castiare, pone·nos a mente.

Su corto-metràgiu fatu dae su regista Simone Contu, est in limba sarda e faeddat de unu maistru de iscola elementare chi chircat de pesare fìgiu suo cun un’identidade e cun valores de cultura sarda. A sa revessa su pipiu, atore de bravura, at a imparare a babbu suo chi is règulas, calicuna borta, sunt isballiadas, contradditòrias. 45 minutos chi contant de iscola, de cussu chi pertocat babbos e fìgios, ma prus a totu ponet dae una parte sa traditzione e dae s’àtera sa vida moderna.

S’istòria est a inghìriu de una crabitedda (Conca Niedda), regalada a su pipiu dae su babbu pro ddi fàghere connòschere su raportu cun is animales. E su pipiu s’at afetzionare a sa craba, finas a iscobèrrere ca est istada bochida pro su pràngiu de Paschixedda.

Immoe ischis calicuna cosa de su film, nos si racumandamus de ti ddu castiare, innoe a giosso:

A pustis podes castiare unu video bellu meda fatu dae Piersandro Pillonca a su regista Simone Contu. In su cast ddoe ant traballadu: Pierpaolo Piludu, Gisella Vacca, Fausto Siddi, Giuseppe Boy, Massimo Zordan, Maria Grazia Serrali e Katiusha Mura. Su pipiu Roberto Marci, de Seui, est istadu bravu meda. Ant retzitadu puru Paolo Pierobon e su musitzista Piero Marras chi, in pares a Francesco Veloci, at postu cura a sa mùsica de su film.

Foto dae Sardegna Digital Library

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.