De su 9 a s’11 de ladàmini torrat su BìFoto Fest – Fèstival Internatzionali de sa Fotografia in Sardigna, arribau a sa de sèixi editzionis. Po tres diis Mòguru e Crucuris ant a acasagiai is eventus inauguralis de unu caminu espositivu nou, cun otu progetus fotogràficus chi ant a abarrai espostus po a su mancu dòighi mesis, acumpangiaus de vìsitas ghidadas, atòbius cun is autoris, leturas portfolio, premiatzionis e mùsica.
Ònnia editzioni de su BìFoto pigat s’ispiratzioni de unu branu de mùsica o de un’àlbum scioberau de sa diretzione artìstica. A pustis de Fabrizio De André, Eddie Vedder, Vinicio Capossela, Subsonica, Brunori Sas e Johnny Cash, su tema de su 2026 at a essi “Dio è morto”, scritu de Francesco Guccini in su 1965.
Intre is protagonistas de sa de sèixi editzionis ddoi funt cuatru fotògrafus:
Pietro Masturzo, fotògrafu documentarista e fotorepòrter indipendente, presentat Water Apartheid in Palestine, unu traballu fatu a traessu de una pariga de biàgius in Palestina, mescamente in sa Badde de su Giordanu, chi documentat su tema de s’atzessu a s’àbba de is comunidàdis palestinesas e is efetus de s’ocupatzioni in sa vida de dònnia die in su territòriu.
Sa fotogiornalista palestinesa Fatima Shbair, nàscia e crèscia in Gaza e oi parti de s’Associated Press, esponit Gaza: Life Rewritten by War. Atraessu de immàginis pigadas de aintru de sa gherra, Shbair contat comenti su cunflitu apat mudau is aspetus prus fitianos de sa vida, intre pèrdida, partzidura e chirca de seguresa.
Giampaolo Catogno presentat Ecce Homo, unu progetu in biancu e nieddu dedicau a is ritus de sa Chida Santa in su Mediterràneu. Una chirca incumentzada in is annus Noranta in is biddas de sa Sardigna e a pustis allargada a àteras ìsulas de su Mediterràneu, aundi sa fotografia diventat aina de osservatzioni de sa ritualidadi, de sa fidi e de is traditzionis de su pòpulu.
Cun Tania: la donna trans che sfidò il franchismo, Luca Gaetano Pira portat imbetzis a su BìFoto una chirca fotogràfica e documentària subra sa vida de Tania Navarro, intre is ùrtimas fèminas trans subrabìvidas a sa ditadura ispagnola. Su progetu pertocat archiviu, testimoniàntzia e retratu po torrai a fraigai una stòria marghinada de sa repressioni istitutzionali, ma fintzas de is arretzas de solidariedadi e de sa partetzipatzioni a su primu Pride ispagnolu. Is mostras de Pietro Masturzo e Fatima Shbair s’ant a isvilupai in unu caminu espositivu intre Mòguru e Crucuris.
Su programa
