Ispidale de Lanusè, Emodinàmica: mancat una firma ebbia

Bonas novas pro su Nosocòmiu Ogiastrinu, a pustis de sa protesta ispantosa fata dae sos cardiopaticos ghiados dae su sòtziu Amici del Cuore, chi isetant dae prus de tres annos s’abertura de su servitziu de Emodinàmica, arrivande fintzas a s’isciòperu de sas gasi naradas “Meighinas Sarva Vida”, in agiunta a cussu de su fàmene.

In custas ùltimas dies, est istadu su diretore amministrativu de s’Azienda pro sa Tutela de sa Salude (ATS, ndr), s’ogiastrinu Attilio Murru, a comunicare a sos dutores e sos iscioperantes, chi s’at a impignare in primu persone pro bogare de cabudu a una situatzione meda cumplicada, pro su chi pertocat sos provedimentos de acreditamentu de su repartu, pro more chi lompat cantu prima sa firma dae sos ufitzios de s’assessoradu regionale de sa Sanidade. Un’isperàntzia custa, leada cun favore dae sos cardiopàticos, chi pro s’ora ant acabbadu s’isciòperu e s’ocupatzione de su repartu. Ma su primàriu de su repartu de Cardiologia, Carlo Balloi pretzisat chi “si intro s’8 (de ghennargiu, ndr) , non at a èssere firmadu su documentu, amus a èssere nois etotu a iscioperare a su postu de sos cardiopàticos”.

Fintzas su Sindigu de Lanusè, Davide Burchi, peri non cundividende custas forma perigulosa de protestas, at naradu de èssere prontu a donare coddu a s’initziativa de sos dotores, si dae Casteddu, no ant a arrivare solutziones cuncretas pro sa sala de Emodinàmica, bidu chi totu est prontu pro ospitare sos ispecialistas e cumentzare cun s’atividade programmada, mancat una firma ebbia.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.