“Reagentes acabbados fintzas pro sos casos de apretu”. Ddu denuntziat Màuru Pili, mere de Unidos, chi at atacadu s’assessore de sa sanidade Luisu Arru, narende ca est unu faulàrgiu.
“De eris su laboratòriu de anàlisis de su Santa Bàrbara de Igrèsias – si leghet in una nota iscrita de Pili – no fàghet prus nemmancu sas anàlisis de apretu, fintzas pro sos malàidos de coro a sos cales sunt istados negados fintzas sos esàmenes de sa coagulatzione”.
Sa situatzione segundu Pili fiat giai drammàtica, pro ite nemos podiat fàghere prus sas anàlisis a Igrèsias. Immoe s’agravat ancora de prus pro s’ausèntzia de reagentes.
“Totu custu – sighit – est un’atentadu a sa salude pùblica de sa Sardigna. Fàghere mancare sos reagentes est un’àteru sèberu de responsabilidade mancada. Totu custu faghet cumprendere comente Arru e Moirano si nde frigant de sa salude de sos tzitadinos, neghende finas sas anàlisis prus elementares, mustrende s’incapatzidade de s’impònnere in custa gestione iscandalosa de sa sanidade sarda”
