Fiat su noe de freàrgiu cando, duos meses a oe, duos frades calabresos fiant iscumpàrridos dae Patiolla, sa bidda in ue biviant. Is carabineris ant agatadu is corpos de Massimiliano e Davide Mirabello, 35 e 40 annos, chenàbura 3 de su mese de abrile, in unu sartu a tesu de su tzentru.
Su logu dd’at iscoviadu Joselito Marras, s’òmine de 57 annos acusadu paris cun su fìgiu Michael de 27 annos de sa morte de is duos frades. Joselito diat àere naradu a su pm chi dd’at interrogadu, de àere ochidu issu, a solu, ambos is frades e chi a pustis de su delitu diat àere atacadu is corpos in mesu a is matas. Diat àere naradu puru de èssere istadu afarrancadu e chi issu at ochidu pro si defèndere.
Est custu su capìtulu ùrtimu de un’acontessimentu nàschidu forsis pro more de una briga istèrrida dae tempus meda pro chistiones de làcanas tra is famìlias Marras e Mirabello. E concluida in su merie de su 9 de su mese de freàrgiu cando is frades Mirabello fiant essidos dae domo cun sa vetura issoro, segundu is incuirentes pro atobiare is Marras, sena però nde torrare prus. Is carabineris sa die in fatu aiant agatadu sa vetura abbrugiada.
Is carabineris de su Ris in su sartu in ue ant agatadu is corpos de Massimiliano e Davide Mirabello.
Posca, su 20 de su mese de martzu sa bortada: detzisivas pro s’arrestu de Joselito e Michael Marras sunt istadas is matzas de sàmbane agatadas una pariga de dies a pustis de s’isparimentu in sa portina de sa vetura de sa famìlia Marras: is anàlisis de is carabineris de su Ris ant atzertadu chi sunt cumpatìbiles cun su sàmbene de Davide Mirabello.
In prus su pùblicu ministeru at iscritu in su registru de sos indagados un’àtera persona, un’òmine de 42 annos de Patiolla: su sero de s’isparimentu de is frades Mirabello, issu fiat a girollu cun s’isposa sua e calleddu cando in mesu caminu aiant bitu sàmbene e unu gorteddu chi issu aiat regaladu a Davide Mirabello. S’òmine dd’aiat boddidu e donadu a is carabinieri isceti a pustis de unu mese, ma abbrugiadu e sena arrastos de Dna. L.M.
