Dae su 10 a su 12 de ladàmine, ghennas abertas in is logos de s’istòria e de sa cultura de su territòriu. Ant a èssere prus che totu is istudiantes e is voluntàrios de is assòtzios chi ant a contare a is visitadores monumentos, crèsias e sitos archeològicos de Tortolì.
Tortolì e Arbatassa s’abrontant a bìvere tres dies totu intregadas a sa cultura e a s’istòria cun Monumentos Abertos 2026, in programa dae sàbadu 10 a lunis 12 de ladàmine. Un’editzione chi fintzas ocannu at a tènnere comente protagonista su territòriu contadu dae is pitzocos e dae is voluntàrios. Pro s’ocasione, medas logos de s’istòria, de s’arte e de sa traditzione ant a abèrrere a s’indonu a su pùblicu e ant a èssere is istudiantes etotu, paris cun is assòtzios culturales e a is voluntàrios, a acumpangiare residentes e visitadores a s’iscoberta de su patrimòniu locale.
Su valore de sa manifestatzione, difatis, est sa partetzipatzione de is levas noas. Is pitzocos no ant a èssere ispetadores ma ghias, contende is monumentos e tretos prus ispantosos de sa tzitade issoro. Unu modu cuncretu pro fàghere connòschere s’istòria de su territòriu a residentes e is de foras.
Tra is logos prus interessantes dae bisitare s’àrea archeològica de S’Ortali de su Monte, chi at a èssere atzessìbile sena pagare billete cun is bìsitas ghiadas contivigiadas dae is istudiantes de s’Istitutu IANAS agiudados dae is ghias de sa Fondazione Tortolì. Is istudiantes ant a èssere protagonistas fintzas de s’aberidura istraordinària a su pùblicu de su palatzu istòricu de bia de Missennore Virgilio, sede de is Iscolas Elementares Tzentrales. In Caserma betza, a unu tempus sede de is Carabineris Reales a caddu, ddoe ant a èssere is istudiantes de s’Istitutu Cumprensivu 2 Monte Attu chi, cun is istudiantes de su IANAS, s’ant a ocupare fintzas de s’acasàgiu in s’Ex Blocchiera Falchi.
In Arbatassa, Portu pro is tortoliesos, s’at a pòdere artziare sa Turre de Santu Micheli, acantu s’ant a pòdere bìdere fintzas s’estemporànea “Arte in cammino”, una mustra de modellismu navale, unu cursu de nodos e sa mustra fotogràfica “Agrosfera”. Su programa at a cumprèndere in prus is bisitas a sa Turre de Santu Millanu in Portu Frailis e su Faru Bellavista in Monte Turri, contivigiadas dae is pitzocos de s’ITI cun s’agiudu de s’Assòtziu Alpherat.
Tretu fintzas pro is logos de s’ispiritualidade e de sa traditzione, cun s’aberidura de sa crèsia Parrochiale de Sant’Andria e de su campanile suo, de sa crèsia de Sant’Anna e de sa crèsia de Santu de su de su SS. Sarbadore, gràtzias a s’interessamentu de is obrerias issoro.
In su museu etnogràficu de sa Domu Bècia, s’Assòtziu Grupu Folk Sant’Andria proponet s’espositzione “Is Crèsias de Tortoli/Arbatax ieri e oggi”, cun modellos de is crèsias antigas e fotografias istòricas. In su Forru de sa Tèula at a èssere possìbile a partetzipare a is laboratòrios de tzeràmica e de làdiri, mentras in su Teatru Santu Frantziscu s’Assòtziu Simul proponet su reading “Il teatro San Francesco tra storie e leggende”. In su percursu de bisitas sunt presentes fintzas sa Biblioteca Comunale Emilio e Joyce Lussu e su puntu informativu de “Su Logu de s’Iscultura”, a costadu de s’òpera “Grande Sipario”.
A sustentare s’initziativa is voluntàrios de s’Universidade de sa Tertza Edade puru (UTE), chi ant a gestire su Puntu informativu printzipale a s’agabbu de Cursu Umberto in is tres dies. Pro lòmpere a is giassos prus larganos, comente su Faru e S’Ortali de su Monti, est a disponìmentu su postalinu.
Sa manifestatzione at a sighire fintzas lunis su 12 de ladàmine dae is 9 a is 15, cun s’agiunta in Arbatassa de un’àteru autobus e un’àteru puntu informativu, contivigiadu dae is istudiantes de s’Istitutu IANAS pro retzire is passigeris de sa nave de crotziera Renaissance, cun belle 1.300 passigeris, prus s’echipàgiu.
Duncas, tres dies acanta Tortolì at a abèrrere is ghennas de su patrimòniu suo e ant a èssere mescamente is giòvanos e is voluntàrios a ddu contare.
Inoghe su programma cumpletu
