Dae su 22 a su 24 torrat sa manifestada ‘Prendas de Ittiri’

Torrat “Prendas de Ittiri”: dae su 22 a su 24 de su mese de santandria un’eventu chi proponet artesania, mustras de arte, laboratòrios e naturalmente sos primores de s’enogastronomia

Ricu e vàriu su percursu oramai definidu de s’editzione nùmero 14  chi at cumentzare chenàbura 22 a sas oras 16 in sa Biblioteca Comunale de Ìtiri Cannedu. Organizada dae s’omònimu assòtziu, sa manifestada at a animare sas domos e sas rugas de su tzentru istòricu finas a su 24 de su mese de santandria. Ant a sesenta sos espositores chi ant a pònnere in mustra sas “Prendas”, sas prendas de su territòriu, chi non rapresentant isceti un’aspetu econòmicu, ma pertocant peri s’istòria, su patrimoniu culturale e artìsticu, sa traditzione e fintzas su futuru de Ìtiri Cannedu, gràtzias a sos giòvanos chi ant rilantzadu sas diferentes fainas.

Sunt 17 sos espositores de sos setores arte e artesania: dae sa traballadura de sa linna a cussa de su ferru e de sa graniglia, dae sa sartoria a s’oggettistica, dae sos frores a sa tzeràmica.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.