Istràngios irregulares dae s’Algeria a sa Sardigna, immoe bastat. Est sa rechesta fata dae su presidente de sa Regione Francesco Pigliaru in nd’una lìtera imbiada a su ministru de s’Interno Matteo Salvini pro canto pertocat su chistione de s’arribu in Sardigna de meda pessones dae su paisu de su nord Africa. Sa voluntade de Pigliaru non est cosa noa, giai cando in su Viminale n’che fiat Minniti s’argumentu fiat istadu pigadu in contu.
Ma immoe Pigliaru sutulineat chi sa situatzione in sos meses de s’istadi est andande peus. “Sos arribos sena controllu – iscriet Pigliaru – causant meda problemas pro gestire sos flussos migratorios non programados in is domos de acasagiamentu chi giai sunt in dificultade. Ocannu dae s’Algeria sunt giai arribadas prus de 500 pessones, unu andamentu chi paret su matessi de s’annus coladu cando in Sardigna fiant arribados 1936 istrangios (in su 2016 fiant istados 1106)”.
Segundu Pigliaru “tocat firmare de presse” custu fenomenu pro evitare chi sa rotta Algeria-Sulcis siat un’àtera istrada de fua conca a s’Europa. Sa retzeta de su presidente est cussa de traballare in paris cun is autoridades algerinas pro faghere un’acòrdiu intre Italia e Algeria pro ponnere fine a custu fenomenu. “Semus prontos – concluit Pigliaru – a suportare, s’in casu mai, is polìticas diplomaticas chi ant a èssere avviadas”.
