In grupu iscudint unu giovanu de sa Guinea, ratzismu in Tàtari Episodiu lègiu lunis a de note. Unu grupu de pitzocos contra a unu giovanu de 22 annos.

“So in domo mea e inoghe fatzo cuddu chi bolo” . Sunt custas sas paraulas chi at naradu unu de sos agressores de unu giovanu migrante bennidu dae sa Guinea Bissau e chi bivet e istudiat in Tatàri. Eris a de note est istadu firmadu dae unu grupu de chimbe persones serent sa ruga de Cossiga e s’arburada Berlinguer. Prima unu catzotu posca sa briga, in chimbe contra a unu, acabada gratzias a s’interventu de duas feminas chi ant ghetadu s’alarme. In su logu est arribada sa politzia locale chi est iscumbatende pro agatare sos responsabiles.

“Si gestos brutales comente a custu andant semper cundennados, sa motivatzione ratziale nde creschet sa gravidade, ofendende su sensu de tziviltade, de cunvivèntzia e de umanidade”. Aici su presidente de sa Regione Francesco Pigliaru. S’assessore de sos Afares Generales Filippo Spanu, chi tenet sa dèlega pro sos flussos migratòrios, narat chi sa Regione “est galu prus determinada a giùghere dae in antis sos progetos pro s’inclusione de sos richiedentes asilu e de sos titulares de amparu internatzionale”.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.