Saboris antigus, atòbiu nou a Seurgus Donigala

Seurgus Donigala aberit is ennas de sas domos de sa bidda sua domìniga 17 de su mese de santandria pro laboratòrios, animatzione e ispetàculos in is rugas: totu pro torrare a su connotu, a sa manera de sos antigos mestieris, de s’arte tramandada dae su babbu a sos fìgios de su pane, de su casu e de su mele.

“Ocannu pro su nostru Saboris Antigus – at naradu Antonello Perra, primu tzitadinu Seurgus Donigala – apamus seberadu de fàghere torrare a nàschere una die de vida cuotidiana de su tempu coladu. In su mese de santandria fiat difatis forte s’ammentu de sos mortos, chi s’espressaiat in su modu de bestire, in su coghinare e in s’èssere de ànimu garbosu”.

SABORIS ANTIGUS – SIURGUS DONIGALA

SEGNATEVI QUESTA DATA!17 NOVEMBRE 2019SABORIS ANTIGUS A SIURGUS DONIGALA

Pubblicato da LS Video Produzioni su Lunedì 11 novembre 2019

Sos laboratòrios. Durante totu sa die, de importu mannu at a èssere sa sa traballadura de su late ovinu. A sighire sa mudadura de su mele. Fintzas sos prodùidos de su porcu ant a èssere ogetu de dimustratziones in mesu a sos ispàtzios de sos allevamentos de sa bidda. Su laboratòriu de sa traballadura de su pane, de sa pasta e durches tìpicos locales a sa Domo de su pane, ue b’at a àere fintzas una dimustratzione subra comente a si traballaiat su ràmene. In prus, est prevìdida una mustra de caddos cun s’allestimentu de unu manìgiu in su cale at a èssere possìbile pigare letziones.

Animatzione e ispetàculos. De su mangianu ant a èssere presentes su grupu “Sonus de Beranu” e su grupu folk Seurgus Donigala, cun càntigos e ballos totu die. Dae sas 15 a sas 18 “Giogus Antigus” cun sa mustra de sos giogos antigos e sa dimustratzione de s’usu issoro, cun sa collaboratzione de su grupu parrochiale Seurgus Donigala e su grupu scout. A sas oras 18 dae sa Domu de Su Conti at a partire s’isfilada de “Is Scruzzonis” chi s’at a concruire in sa piatza Combattenti.

A sighire s’ispetàculu musicale cun su grupu Istentales e ballos cun sos grupos folk.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.