Su Comitadu Pro Sardinia dae unu mese est boddinde sas firmas pro indire bator referendum consultivos regionales. Duos tra custos pertocant sa cannabis, prus a notu sa legalitzazione de sa cannabis ricreativa e sa produtzione regionale de sa cannabis terapèutica. Sos àteros sunt diferentes: unu est pro sa regionalizare s’Anas e unu pro ativare sos puntos francos prevìdidos dae s’Istatutu ispetziale.
“Sa tentada nostra est de essire dae sas gàbbias de s’emergentzia pro chircare alternativas a su modellu de isvilupu impostu dae s’Istadu italianu e dae una classe polìtica locale chi no tenet bisione e bisos”, narat Paolo Zedda, consigere regionale indipendentista e presidente de su Comitadu: “Su mercadu de sa cannabis, siat a impreu ricreativu chi terapèuticu, est in espansione forte a beru: in sos istados chi ant operadu seberas in custa diretzione creschet su Pil, naschent postos de traballos, nch’est benèssere difùndidu e est garantidu su deretu a sa salude”.
Su “modellu nou de isvilupu”, semper segundu Zedda, cumprendet fintzas sa regionalizatzione de s’Anas e s’ativatzione de sos puntos francos: “Sa gestione regionale de is istradas diat pòdere pònnere fine a sa ditatura de s’Anas, eliminare sos ischilìbrios territoriales, creare una relatzione noa tra tzitade e biddas e garantire sos deretos costitutzionales a totus sos sardos” , mentras sa realizatzione de sos portos francos est “imprescindibile pro sos benefìtzios fiscales e s’agiudu a sa nàschida e crèschida de impresas”.
