Sunt istados publicados in s’importante giornale internatzionale “Marinas Pollution Bulletin” sos resurtos de sa prima banda de un’istudiu de sos contaminantes chìmicos emìtidos in s’àrea de su naufragiu de sa Costa Concordia a s’Ìsula de su Giglio, fatu dae su grupu coordinadu dae Marco Schintu, professore de su Dipartimentu de Sièntzias Mèdicas e Sanidade Pùblica de s’Universidade de Casteddu.
DE ISCHIRE. Sa Costa Concordia fiat una nave da sa cumpangìa de navigatzione Costa Crociere. Su 13 de su mese de ghennargiu de s’annu 2012 est naufragada posca aere corpadu rocas a suta de su mare serente a s’isula de Giglio. In s’intzidente sunt morridas 32 persones.
S’artìculu, dae su tìtulu “Passivas sampling monitoring of PAHs and trace metals in seawater during the salvaging of the Costa Concordia wreck (Parbuckling Project)”, tenet sa firma de Marco Schintu, Alessandra Marrucci, Barbara Marras, Marco Atzori, David Pellegrini.
Marco Schintu
Semus chistionande de unu istudiu afidadu dae s’Ispra (s’Istitutu Superiore pro s’amparu e sa chirca ambientale) – a pustis de su naufràgiu de sa nave a s’ìsula de su Giglio (ghennàrgiu 2012) – a s’iscuadra ghiada dae su dotzente cagliaritano, chi dae annos si distinghet in su setore.
“Non bi sunt istados mannos fenòmenos de incuinamentu – ispiegat Schintu – ma nointames su traballu at permìtidu de dimustrare chi sas sustàntzias agatadas, puru semper in suta de sos lìmites de contzentratzione fissados dae sa lege, prus chi a su relitu fiant de s’atribuire a sas fainas de su cantiere”.
S’iscumbata, fata cun tècnicas de campionamentu passivu, s’est acostagiada a cussa fata dae sos entes istitutzionales cun sos mètodos ufitziales. Su compudu est duradu finas a su tèrmine de sas operatziones e est istadu estèndidu fintzas a su biàgiu de trasferimentu de sa nave in Gènova.
A galu oe su compudu fatu a su Giglio de s’Universidade de Casteddu cun su campionamentu passivu est su prus ampru e importante fintzas a como giutu in àmbitu internatzionale.
