Una collaboratzione pretziosa intre su Comunu, su Comitadu de sa festa e maicantos Assòtzios at inchingiadu in manera ufitziale s’Editzione 2023 de sa Festa de Santu Sarvadore e sa Cursa de is Scrutzus de Crabas.
S’eventu, presentadu a sos giornalistas in una cunferèntza, tenet unu postu de importu intre sos Eventos Identitàrios Mannos de sa Regione Sardigna e est aparitzadu dae su Comunu de Crabas, dae su Comitadu de sa festa Santu Sarvadore e dae sos Assòtzios Is Curridoris, Santu Srabadoeddu e Entes Locales pro s’Ispetàculu, cun s’agiudu finantziàriu de s’Assessoradu a su Turismu de sa Regione Sardigna.
Su Sìndigu de Crabas, Andrea Abis, at postu a notu s’importu de custa collaboratzione chi durat dae medas annos, ponende in evidèntzia comente a s’eventu siat istadu onoradu de su tìtulu de “Grande Evento Identitario regionale”, sende chi rapresentat unu momentu de significadu fungudu pro s’identidade comunitària de Crabas.
Enrico Giordano, Assessore a sos Traballos Pùblicos, at allegadu de sa seguridade de s’eventu, mentras s’Assessore a sa Cultura, Ispetàculos e Turismu, Carlo Trincas, at evidentziadu s’importu de sa comunicatzione istratègica pro artziare galu de prus sa calidade de s’eventu.
Sa Festa de Sanru Sarbadore est un’apuntamentu de non pèrdere pro totu cussos chi si cherent imbèrghere in s’istòria, in sa traditzione e in sa cultura de sa Sardigna. Custa manifestatzione, chi naschet dae s’unione tra devotzione religiosa, cultura e identidade, agabbat cun sa famada Cursa de is Iscrutzus. S’assòtziu Is Curridoris tenet su còmpitu importante de sighire sa traditzione de sa professone in onore de su Santu.
Mauro Mura, Segretàriu de s’assòtziu Is Curridoris, at evidentziadu su ruolu mannu de s’assòtziu pro afortiare sa fide e pro sensibilitzare sas levas noas a partetzipare cun impinnu e consièntzia.
Sa manifestatzione cumentzat su 25 austu, cun sas fèminas de Crabas, iscurtzas e bestidas cun su bestire traditzionale, chi giughent in professone s’istàtua de Santu Srabadoeddu a su bidditzolu, dende cumintzu a su novenàriu. In custu perìodu su bidditzolu si torrat a prènnere de gente. Dae in cue sos residentes de sas domigheddas si nche tràmudasnt a su logu de sa festa, chi at a abarrare abitadu finas a sa concrusione sua, lassende su bidditzolu belle bòidu finas a s’annu sighente.
In custa manifestatzione su ruolu de sas fèminas est tzentrale, comente evidentziadu dae sa Presidente de s’Assòtziu Santu Srabadoeddu, Maria Francesca Spanu. Sas fèminas assument unu ruolu de cumentzare de concruire sa tzelebratzione finas s’ùrtima die.
In prus de sa Cursa de is Scrutzus, sunt in programma eventos religiosos chi s’aunint cun armonia a cussos tziviles. Luca Sechi, Presidente de su Comitadu Organizadore, at fatu presente comente in sos annos b’apat tentu una crèschida de partetzipantes e de ispetadores, sinnale de comente sa festa est semper prus apretziada. Su Comitadu at traballadu cun aficu pro cuncordare unu calendàriu capatzu de satisfàghere sas rechertas e sos gustos de unu pùblicu diversu, cumbinende traditzione e mùsica cuntemporànea, segundu sas aspetativas de sos giòvanos.
Sa Festa at a èssere cumpartzida a traessu SuperTV, profilos de canales ufitziales de s’eventu, sa pàgina Facebook de Laura Laccabadora, sas retes sotziales de su Comunu de Crabas e su canale YouTube de EJATV.
