Su presidente de sa Republica Sergio Mattarella a merie posca aere acasagiadu su professor Giuseppe Conte in su Quirinale dd’at incarrigadu de formare su guvernu. Est custa sa bortada chi at isòlvidu sa crisi pòlitica naschida domìniga, candu Mattarella aìat firmadu sas rechestas de M5S e Lega chi fiant fortzande sa manu pro ottennere Paolo Savona comente ministru de s’Economia. Unu seberu chi aiat postu in alarme is àteros istados europeos chi bìiant Savona prontu pro ndi bessire dae s’Euro.
Sa detzisione de Mattarella aiat creadu meda polemicas: Di Maio, su meri de su Movimento chimbe istellas, est arribadu a preguntare sas dimissiones, su “impeachment”, de su presidente de sa Republica. Ma comente giai sutzedidu in antis e a pustis de sas eletziones polìticas de martzu, is partidos ant naradu totu e su contrariu. De aici Di Maio at mudadu opinione candu at bidu chi sas eletziones imbenientes diat aere premiadu sa Lega. Sa matessi cosa at faghidu Matteo Salvini chi forsis at tìmidu sas reatziones europeas a sa crisi polìtica.
Posca tres dies sa bortada. Dae in antis a unu guvernu tennicu ghiadu dae Cottarelli, s’ex incarrigadu a sa spending review, Di Maio e Salvini ant atzetadu de nche bogare Paolo Savona dae su ministeru de s’Economia pro ddu ponnere a su ministeru de sos Afares Europeos. Conte abarrat primu ministru, Di Maio e Salvini pigant duos ministeros de pare a pare cussu de su Traballu e cussu de s’Interno.
