Seadas e àteras bonidades sardas conchistant s’istrada Dae sos màndigos traditzionales a cussos gourmet: sas impresas essint dae sos locales e andant subra bator rodas.

Su street food, mescamente in sos ùrtimos chimbe annos, fintzas in Sardigna est conchistande semper prus sustenidores, tra sos produtores e sos consumadores. Panadas, piticas pitzas isfògiat, culurgiones, seadas ma fintzas panes frattau, panineddos cun petza de brebei, fregula cundida, malloreddos opuru sos prus “trendy” prodùidos gourmet bio o vegani de nou cuntzetu. Oramai belle d’onnia produtu traditzionale sardu podet èssere trasformadu in nd’unu pratu de degustare passigende e, pro fortuna de sos palados, sas propostas creschent e mudant a de die in die comente sos colorados “ristorantes” subra bator rodas, a s’ispissu ligados a manifestatziones e eventos.

In Sardigna, segundu sos datos de s’Osservatòriu pro sas Pmi de Confartigianato Impresas Sardigna, subra fonte UnionCamere-Infocamere, in su 2018 sas impresas registradas comente a “Fainas de ristorazione ambulante” sunt 156 e sunt creschidas de su 56% in sos ùrtimos chimbe annos, contra unu totale de 2.729 e una crèschida mèdia natzionale de su + 58,9%. Sos datos narant puru de 38 atividades ghiadas dae under 35 in su 2018 (24,4% de su totale de sas impresas) e de 4 impresas gestidas dae istràngios (2,6%). Tra sas provintzias, 56 sunt registradas in Casteddu, 48 in Tàtari, 15 in Nùgoro e 14 in Aristanis.

Seada
Una seada.

“Semus meda cuntentos de sa crèschida de custu nou setore de s’alimentatzione – narat  Stefano Mameli de Confartigianato Sardigna – pro ite est sinònimu de oportunidade siat pro sas impresas traditzionales chi annoant e diversificant, siat pro sas noas realidades chi proponent innovativos istiles gastronòmicos. Su street food est una realidade biva e creativa – sutalìniat – fata de coghineris, paneteris, de imprendidores giòvanos e prus pagu giòvanos ma totus acumonados dae s’altivesa de cunservare traditziones familiares o de propònnere noos sabores”.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.