Sa Procura de sa Repùblica de Nùgoro at donadu su pàrrere favorèvole pro torrare a abèrrere su ponte de Oloè, in s’istrada provintziale Ulìana-Durgali, ruìdu in su mese de santandria 2013 pro mori de su tziclone Cleopatra, ue fiat mortu s’agente de Politzia Luca Tanzi, una de sas 19 vìtimas de sa tràgica alluvione in Sardigna. Ddu iscriet s’Ansa.
Mai torradu a abèrrere dae tando, su ponte fiat istadu secuestradu in su mese de freàrgiu 2017 pro garantire sa seguridade. Immoe at a tocare a su tribunale bogare sos sigillos. Sa notizia est istada donada custu manzanu dae su procuradore Giorgio Bocciarelli durante s’udièntzia de su protzessu pro frode in pùblicas fruniduras contra a sos responsàbiles de sa dita chi in su 2014 aiat esecutadu sos traballos.
Segundu s’acusa diat èssere istadu impreadu unu materiale diferente de cuddu prevìdidu in su capituladu de apaltu. In sos meses colados su tribunale aiat refudadu sa rechesta de dissecuestru presentada dae sa Provìntzia de Nùgoro a sa fine de una sèrie de traballos pro pònnere in seguridade su viadotu. Pro sos tècnicos de su palatzu de giustitzia, sas òperas cumpletadas non garantiant àncoras sa seguridade de su ponte.
Oe sa bortada, cun su pàrrere positivu de sa Procura. In su matessi tempus, pro assuprire a sos discumbènios de sa populatzione de sos duos comunos isulados pro mori de sa derrota, Ulìana e Durgali, sa Giunta regionale at autorizadu su fàbricu de unu ponte militare provisòriu de su tipu Bailey, gasi comente rechestu dae sos sìndigos de su territòriu.
“Amus postu totu su remenu nostru pro rèndere a sas comunidades un’ infrastrutura fundamentale pro su territòriu e pro atzelerare su completamentu de sos traballos e garantire sa màssima seguridade. Sa Regione at traballadu in manera crispa pro pònnere a puntu totus sos acumprimentos tècnicos, in paris cun sas àteras autoridades”. Gasi su presidente de sa Regione, Christian Solinas.
