Sighi∙nos

Salude, ite ses chirchende?

Atualidade

Su romanzu de Simonetta Delussu protagonista de unu laboratòriu de letura in su càrtzere de Lanusè

Sa Domo Tzircundarialede Lanusè acasàgiat su progetu triennale “Apriamo le porte al teatro, alla musica e alla lettura”, chi punnat a impreare sa cultura comente mèdiu de rieducatzione e reinserimentu sotziale. Intre sas fainas de s’annu formativu 2024/2025 est istadu insertadu su laboratòriu de letura creativa dedicadu a su romanzu “Il delitto d’onore – La storia di Irene Biolchini” de Simonetta Delussu.

Coordinadu dae sos dotzentes de su CPIA Franca M.A. Loddo e Mario Lombardo, in collaboratzione cun sa Dot.a Alessandra Cingotti, responsàbile de s’Àrea Educativa, su laboratòriu oferit a sos detenutos un’ocasione pro si cunfrontare cun temas profundos comente giustìtzia, identidade e sèberos morales.

Su romanzu de Delussu, chi allegat de unu delitu de onore in Ogiastra, est istadu seletzionadu pro sa capatzidade sua de segugiare riflessiones subra chistiones universales, a s’ispissu serentes a s’esperièntzia personale de sos cartzerados chi ant a leare parte a sa faina. Pro mèdiu de sa letura ghiada e su cunfrontu colletivu, sos detenutos ant a pòdere aprofundire su valore de sos sèberos individuales, torrende a iscobèrrere a issos matessi e achirende una cussièntzia noa.

Pro Simonetta Delussu, iscriora terteniesa autora de romanzos famados comente Stregoneria in Sardegna, Spiriti nella notte e Maissa e il Dey di Algeri, custa no est sa primu esperièntzia esperièntzia in càrtzere chi l’at arrichida a fundu. Su laboratòriu, chi at a interessare belle deghe partetzipantes iscritos a sos cursos de su CPIA, s’at a isvilupare in diversas fases, e at agabbare in un’addòbiu cun s’autora in su mese de martzu 2025. Custu momentu at a ofèrrere a sos partetzipantes s’oportunidade de chistionare cara a cara cun Delussu, aprofundende su ligàmene cun sa narratzione e crèschere s’esperièntzia de su laboratòriu.

Sa letura, in intro de su cuntestu cartzeràriu, devenit unu trastu de crèschida e riscatu, capatzu de abèrrere bisiones noas e de favorèssere sa trasformatzione personale. A traessu de su cunfrontu cun sos temas e sos pessonàgios de su romanzu, sos detenutos ant a isvilupare su pensamentu crìticu e agatare un’ispàtziu pro esplorare s’umanidade issoro.

De lèghere