‘Mantènnere’. Est custu su verbu chi dat su tìtulu a su film chi su 5 nadale l’ant presentadu in Venètzia in intro de sa rassegna ‘Sguardi Musicali’ promòvida dae sa Fondazione Giorgio Cini. Su pùblicu lòmpidu a su CFZ – Cultural Flow Zone de s’Universidade Ca’ Foscari at gasi pòdidu bìdere in anteprima assoluta una pellìcula frutu de duos annos de chirca in su campu e realizada gràtzias a sa bursa de istùdiu ‘Diego Carpitella’ assignada dae s’Istituto interculturale di Studi musicali comparati de sa Fondatzione Cini mentovada.
‘Mantènnere: Custodire il Suono del Sacro’, documentàriu de s’etnomusicologo Diego Pani prodùidu dae Talk About Records, esplorat su significadu culturale e sotziale de su càntigu a prus boghes de Santu Lussùrgiu, ponende paris duas generatziones de cantores de sa Cunfrària de su Rosàriu e su ruolu detzisivu de su càntigu traditzionale in sos rituales de sa Chida Santa.
Cun sos 52 minutos suos de durada, ‘Mantènnere’ si presentat comente “una mirada ìntima e partetzipativa – afirmat su regista – chi pertocat su ligàmene intre mùsica, ritu e comunidade, interroghende·si in contu de traditzione e bidende comente custa siat preservada e trasformada fintzas in relatzione a sos chircadores”.
Sa pellìcula l’ant trasmìtida a merie, in pare cun àteros film dedicados a sa mùsica de Sardigna, in intro de unu die comintzadu a mangianu cun unu seminàriu dedicadu a s’etnomusicologia dialògica. In finitias sa serrada cun su cuntzertu de sos cantores de ‘Sos Zòvanos de Su Rosàriu’, protagonistas de su film in pare cun ‘Su Cuncordu’.
Su film, ambientadu in su tzentru de su Montiferru (cun ripresas realizadas in s’Antica dimora del Gruccione e in sa domo de Donna Caterina posta a disponimentu de sa Fondazione Hymnos) bidet sa partetzipatzione de su film-maker Stefano Zedda, de Elena Cabitza pro su protzessu de editing finale, de s’etnomusicòlogu Marco Lutzu, chi at sighidu s’aprontu intreu de su film ghiende Diego Pani in sos sèberos de règia, e de Roberto Macis pro su missàgiu àudio professionale.
“Unu ringratziamentu particulare andat – serrat su regista – a sa Cunfrària de su Rosàriu e a Don Giancarlo Norio, chi nos ant permìtidu de bìvere sos rituales de sa Chida Santa serentes a sos protagonistas printzipales de custu momentu de grandu importu, e a sos amigos cantores meos de su Cuncordu e de sos Zòvanos chi ant cumpartzidu cun megus custu progetu e chi fiant semper disponìbiles e atentos a difùndere s’arte e sa grandu esperièntzia issoro”.
Su 16 nadale b’at a àere una segunda e ùrtima anteprima de ‘Mantènnere’ , custa borta in sos ispàtzios de s’Universidade de sos Istùdios de Casteddu pro sas Dies de Etnomusicologia audiovisiva. Sa sèrie sua de projetziones comintzat imbetzes su mese de freàrgiu de su 2025.
