Casteddu: Lopez abarrat, ma est setziu in una cadira in ponteus Su traballu est meda de fàghere, e sa gente est arrennegada contra su sèberu de Giulini

Diego Lopez at a sighire su Casteddu comente allenadore. Dd’at detzìdidu su presidente Giulini a pustis de una pariga de dies de pensamentos.

Cale est sa mira immoe? No est cambiada: abarrare in sèrie A. Ma su traballu est meda, e sa gente est arrennegada contra Giulini e contra Lopez. Bastat castiare feti sa pàgina de su Casteddu, cun is tifosos chi abòghinant “bregùngia!”, o cosas comente “giogadores e allenadore chi non serbint a nudda, est a traballare pro binchere e signare, no feti a castiare bòcia”.


Is murrùngios non sunt serbidos a nudda e Lopez est torradu a setzere in una cadira de allenadore chi però est in ponteus etotu: sa gara imbeniente est cun sa Roma, e est fàtzile meda ca tocat a pedire unu miràculu a Sant’Efis pro binchere una partida aici.

Pro immoe su Casteddu est a 33 puntos in sa classìfica, feti a duos puntos in prus de su Chievo, chi immoe est in sa zona de sa Sèrie B.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.