Su 6 e su 7 de santugaine, in Casteddu, pro sa prima borta in Itàlia, b’at a èssere s’assemblea generale de Elen (European Language Equality Network), un’organizatzione non guvernativa impinnada in s’amparu de sas limbas minoritàrias allegadas in Europa.
Pro s’ocasione s’ant a addobiare sos delegados de 174 organizatziones in rapresentàntzia de 50 limbas faeddadas in 25 Istados de s’Unione europea. Su logu seberadu pro custa assemblea generale annuale est su Palatzu Règiu de Casteddu.
S’assemblea est programmada pro su 7 de santugaine: a mangianu s’ant a acumprire sos traballos in setziada plenària, abertos a su pùblicu, a merie, imbetzes, sos delegados ant a presentare sas propostas e risolutziones issoro.
Elen est naschida in su 2011 dae s’unione de unas cantas organizatziones impinnadas in s’amparu de sas limbas regionales e minoritàrias, comente s’Eblul (European Bureau for Lesser-Used Languages) e s’Eurolang. Sa punna primària sua est promòvere, tutelare e avalorare sas limbas prus pagu difusas in Europa. In sos annos, Elen at ammanniadu s’aficu suo pro agiudare sas polìticas promòvidas dae s’Unione europea, dae su Cussìgiu de Europa e dae sas Natziones Unidas, compidende cun atentu sos progetos de lege relativos a sas limbas minoritàrias e promovende initziativas pròpias.
Unu de sos obietivos printzipales de Elen est su de fàghere ratificare de sa Carta europea de sas limbas regionales o minoritàrias (Ecrml) a totu sos Istados de su Cussìgiu de Europa. Custu documentu, intradu in vigèntzia in su 1998, punnat a tutelare sas limbas no ufitziales, ma a dolu mannu, no est galu devènnidu parte de sa legislatzione natzionale italiana.
Tore Cubeddu, rapresentante de s’assòtziu Babel e de su Babel Film Fèstival, at naradu: “Pro s’assòtziu Babel su de acasagiare s’Assemblea generale de Elen est un’onore. At a èssere un’oportunidade manna pro torrare a pensare sa polìtica linguìstica de s’ìsula Nostra in intro de unu cuadru polìticu e sotziale europeu. At a èssere un’ocasione de cunfrontu e addòbiu cun totu sas minorias de su Continente Betzu, una manera pro s’intèndere prus pagu solos e progetare unu benidore comunu rispetosu de totu sas identidades e de sas diferèntzias in unu cuadru de unidade e fraternidade”.
S’eventu s’at a fàghere in sas matessi dies de sa de oto editziones de su Babel Film Fèstival (dae su 2 a su 7 de santugaine), una manifestatzione tzinematogràfica internatzionale chi seletzionat sas mègius pellìculas de totu su mundu fatos cun sas limbas minoritàrias.
In ocasione de su fèstival, at a èssere presentadu “My Culture,” unu progetu chi rapresentat sa primu prataforma de Vìdeos a rechesta dedicada a sas produtziones multimediales de sas limbas minoritàrias e regionales chi in Europa rapresentant in prus de 50 milliones de tzitadinos. A s’ispissu custas produtziones benint esclùdidas dae sos tzircùitos mannos e “My Culture” punnat a minimare custa mancàntzia.
