Ratificare sa Carta europea de sas limbas minoritàrias (Ecrml), su documentu a amparu de sas limbas no ufitziales aprovadu in su 1998 ma chi non faghet parte de sa legislatzione natzionale italiana. Est sa rechesta chi arribbat dae Casteddu dae s’assemblea generale de Elen, s’organizatzione non guvernativa chi si ponet comente a obietivu su de promòvere, tutelare e avalorare sas limbas prus pagu faeddadas in Europa.
Est sa prima borta in Itàlia pro sos traballos de s’assemblea generale de Elen. Nche fiant sos delegados de 174 organizatziones in rapresentàntzia de 50 limbas faeddadas in 25 Istados de s’Unione europea. A sos traballos at partetzipadu fintzas Fernand de Varennes, reladore ispetziale de sas Natziones Unidas pro sas limbas minoritàrias.
