Is bibliotecas comunales de Bunnànnaru, Cossoine, Boroneddu, Dèsulu e Serramanna, in parte serradas pro more de s’epidemia, ant detzisu de no abarrare firmas, ma de si donare de fàghere aparitzende pro, mèrcuris su 9 de mese de idas a is 4 de merie, sa presentatzione in sardu de duos libros, unu de custos essidu in is chidas coladas.
S’autore est Giuseppe Coròngiu, ativista de su Movimentu linguìsticu, cumponente de su Coordinamentu sardu ufitziale, giai diretore de su servìtziu linguìsticu regionale. Sa presentada at a èssere trasmìtida in contemporànea in is pàginas Facebook de is bibliotecas comunales. S’at a allegare de “A dies de oe”, sàgiu subra s’iscritura sarda contemporànea, essidu dae pagu cun Condaghes e de “Metropolitània“, regorta de contos distòpicos, eròticos e polìticos, essidu s’annu coladu pro sa domo editora Palabanda. Paris cun Coròngiu ddoe at a èssere su giornalista e operadore culturale Antonio Caria.
Dae is bator corratzos de s’ìsula, gràtzias a sa tecnologia, unu signale de aficu pro unu setore, cussu culturale, iscambadu dae sa pandemia e sena prus sa possibilidade de acumprire su ruolu suo de promotzione sotziale e de promotzione librària. Pròpiu custas realidades de is comunos de s’internu, dannificadas meda dae s’impossibilidade de cuncordare addòbios pùblicos in presèntzia, gràtzias a s’impreu de is mèdios sotziales, depent iscummìtere subra sa limba sarda, chi in custa iscuta de tempus podet èssere unu rimèdiu importante, un’antìdotu pro parare fronte a is disacatos collaterales dèpidos a s’ispàinu de su Covid 19 e a s’ismenguamentu de is initziativas culturale. Is chimbe bibliotecas sunt gestidas dae sa cooperativa sotziale Ali.
