In sardu si podet contare fintzas sa fantascièntzia In Aristanis sa presentada de su libru nou, iscritu in sardu, de Giuseppe Corongiu

Fantascièntzia, erotismu e atualidade in sos contados in sardu de Giuseppe Corongiu. Est in programma pro sàbadu 16 santandria in Aristanis, acanta de sa sala bistrot de su Cafè Marigosu, in pratza Roma, as sas 17.30, sa presentada de su libru “Metropolitània e àteros contos tòpicos, distòpicos e utòpicos” de Giuseppe Corongiu. Introduit Marinat Casta, intervenint, a sa presèntzia de s’autore, Isabella Tore e Luca M. Atzori. Organizant sa Palabanda Editziones e sa Libreria Mondadori.

“S’ocasione  – est iscritu in nd’una nota – at a èssere òtima pro connòschere e riflètere cun un’ òpera in sardu chi s’est cunfrontada in su mercadu editoriale chirchende su rinnovamentu cun temas e argumentos de una traditzione consolidada. S’autore biàgiat, in sardu, in vàrias èpocas, dae unu futuru distopicu a sos annos Otanta e Noranta de su sèculu coladu, pro contare una Sardigna chi est isparessende. Batallas, fuas, amores disisperados, fantascièntzia, eros, vida cuotidiana, paradossos narrativos, tzinismu e inchiestas giuditziàrias faghent de isfundu a sos fatos semper originales, mai banales. Si prestat atentu a sas realidades urbanas, a sos biàgios, a mundos cuntemporàneos comente a cuddu de sa burocratzia, de su giornalismu, de sa polìtica”.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.